اتىراۋ وبلىسىندا رەسەيگە باعىت العان اۋىر جۇك كولىگى 9 تۇيەنى قاعىپ كەتتى
اتىراۋ. KAZINFORM - اتىراۋ وبلىسىندا اۋىر جۇك كولىگى جول بويىندا جۇرگەن 9 تۇيەنى قاعىپ كەتتى. جۇك كولىگىن ازەربايجان رەسپۋبليكاسىنىڭ ازاماتى جۇرگىزگەن.
اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جول-كولىك وقيعاسى كەشكى ساعات 19:20 شاماسىندا بولعان.
- اقتوبە- اتىراۋ- رەسەي فەدەراتسياسىنىڭ شەكاراسى باعىتىنداعى تاس جولدىڭ 814-شاقىرىمى تۇسىندا جۇك كولىگى 9 تۇيەنى قاعىپ كەتتى. جول-كولىك وقيعاسى قۇرمانعازى اۋدانىنداعى قۇرمانعازى اۋىلىنا جاقىن ماڭدا تىركەلدى. تۇيەلەر جول بويىندا قاراۋسىز جۇرگەنى انىقتالدى. ازەربايجان رەسپۋبليكاسىندا تىركەلگەن جۇك كولىگىنىڭ جۇرگىزۋشىسى مەديتسينالىق ساراپتامادان وتكىزىلدى. ساراپتاما قورىتىندىسىنا سايكەس جۇرگىزۋشىنىڭ الكوگولدىك ىشىمدىك ىشپەگەنى بەلگىلى بولدى. جول-كولىك وقيعاسىنان جۇرگىزۋشى جاراقات المادى، - دەپ حابارلادى دەپارتامەنتتىڭ باسپا ءسوز قىزمەتى.
پوليتسيا قىزمەتكەرلەرى اتالعان جول-كولىك وقيعاسىنا قاتىستى ءتيىستى ءىس-قۇجاتتارىن جيناقتادى.
- كولىك جۇرگىزۋشىلەرىنە تاۋلىكتىڭ بارلىق كەزەڭىندە جول قوزعالىسى ەرەجەسىن ساقتاپ، جىلدامدىقتى شەكتەن اسىرماۋدى ەسكەرتەمىز. اسىرەسە، كەشكى مەزگىلدە جولدا جۇرگەندە قاۋىپسىزدىك شاراسىن قاتاڭ ساقتاعان ءجون. ال تۇرعىندار جەكە يەلىكتەگى ءتورت تۇلىكتى جول بويىنا قاراۋسىز جىبەرۋگە بولمايتىنىن ەسكەرۋى قاجەت، - دەپ ءمالىم ەتتى دەپارتامەنتتىڭ باسپا ءسوز قىزمەتى.
اۆتور
جولداسبەك شوپەعۇل
