اتىراۋ وبلىسىندا مال ىزدەۋگە شىققان 4 ادام جوعالىپ كەتكەن

اتىراۋ. KAZINFORM - اتىراۋ وبلىسىندا مال ىزدەۋگە شىققان 4 ادام جوعالىپ كەتكەن. ونىڭ اراسىندا 8 جاستاعى ءجاسوسپىرىم بولعان.

بۇل تۋرالى اتىراۋ وبلىستىق توتەنشە جاعدايلار دەپارتامەنتىنە بۇگىن، 19-اقپاندا ساعات 00:50 دە حابار تۇسكەن.

«ماقات اۋدانىنداعى ماقات كەنتىنىڭ تۇرعىندارى مال ىزدەۋگە شىعىپ، ەلدى مەكەنگە كەرى ورالماعانى انىقتالدى. ولار كەشە، 18-اقپاندا ساعات 08:00 دە ماقات كەنتىنەن 60 شاقىرىم قاشىقتىقتا ورنالاسقان قىستاقتاردىڭ بىرىنە قاراي تويوتا اۆتوكولىگىمەن مال ىزدەپ، جولعا شىققان. اۆتوكولىكتە 1967، 1983، 1984 -جىلعى ءۇش ادام مەن 2016 -جىلعى ءبىر بالا بولعان»، - دەپ حابارلادى دەپارتامەنتتىڭ قوعاممەن بايلانىس توبى.

«بۇگىن، 19-قاڭتاردا ساعات 14:00 دە جوعالعان ادامداردى اۋەدەن بارلاۋ جۇرگىزۋ ءۇشىن توتەنشە جاعدايلار مينيسترلىگىنىڭ تىكۇشاعى تارتىلدى. تىكۇشاقپەن ىزدەستىرۋ- قۇتقارۋ جۇمىسى ءساتتى اياقتالىپ، جەرگىلىكتى ۋاقىتپەن ساعات 14:40-تا جوعالعان ادامدار امان-ەسەن تابىلدى. ولاردىڭ ماقات كەنتىنەن 80 شاقىرىم قاشىقتىقتا اۆتوكولىگىى باتپاقتى جەرگە باتىپ، شىعا الماي قالعان. تابىلعان 4 ادام مەديتسينالىق كومەكتى قاجەت ەتپەدى»، - دەپ ءمالىم ەتتى دەپارتامەنتتىڭ قوعاممەن بايلانىس توبىنان.

ىزدەستىرۋ- قۇتقارۋ جۇمىسىنا اتىراۋ وبلىستىق توتەنشە جاعدايلار دەپارتامەنتى مەن ماقات اۋداندىق پوليتسيا بولىمىنەن، تۋىستارىنان 18 ادام، 5 تەحنيكا تارتىلدى.

ەسكە سالا كەتەلىك، بۇعدان بۇرىن اتىراۋ وبلىسىندا ءبىر كۇندە كولىگى باتپاققا باتقان 15 ادام قۇتقارىلعانىن حابارلاعان ەدىك.