اتىراۋ وبلىسىنا قانشا قانداسىمىز كوشىپ كەلدى
اتىراۋ. KAZINFORM - بيىل اتىراۋ وبلىسىنا شەت مەملەكەتتەردەن 239 ەتنيكالىق قازاق كوشىپ كەلدى. ولارعا قانداس مارتەبەسى بەرىلگەن.
اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىنىڭ مىندەتىن ۋاقىتشا اتقارۋشى ەركەبۇلان ءابىلقاسىموۆتىڭ ايتۋىنا قاراعاندا، قانداستار 7 مەملەكەتتەن قونىس اۋدارعان.
«بيىل جىل باسىنان بەرى اتىراۋ وبلىسىنا وزبەكستان، رەسەي فەدەراتسياسى، قىتاي، تۇرىكمەنستان، ۋكراينا، تاجىكستان مەن تۇركيا ەلىنەن 198 وتباسى كوشىپ كەلدى. بۇل وتباسىلارداعى 239 ەتنيكالىق قازاق قانداس مارتەبەسىن الدى. ولاردىڭ اراسىنان 21 قانداس جۇمىسسىز رەتىندە تىركەلگەن ەدى. قازىر ولاردىڭ 7 ەۋى تۇراقتى جۇمىسقا ورنالاستى. ەندى تىركەۋگە الىنعان وزگە قانداستاردى جۇمىسپەن قامتۋ ماسەلەسى قاراستىرىلىپ وتىر. وسىعان بايلانىستى ولارعا ءتۇرلى مەكەمەدەگى بوس جۇمىس ورىندارى ۇسىنىلدى»، - دەپ حابارلادى ەركەبۇلان ءابىلقاسىموۆ.
ونىڭ پىكىرىنە سۇيەنسەك، قازاقستانعا كوشىپ كەلۋگە نيەت بىلدىرگەندەردىڭ ۇلتى قازاق ەكەنىن راستايتىن قۇجاتى بولۋى قاجەت.
«مۇنداي قۇجاتى بولماسا، كوشىپ كەلۋشىلەردىڭ ۇلتىن ايقىنداۋ ماسەلەسى ارنايى كوميسسيادا قارالادى. كەيىن جەرگىلىكتى اتقارۋشى ورگان اتالعان كوميسسيانىڭ ۇسىنىسى نەگىزىندە قانداس مارتەبەسىن بەرۋ نەمەسە باس تارتۋ تۋرالى شەشىم قابىلدايدى»، - دەپ ءمالىم ەتتى ەركەبۇلان ءابىلقاسىموۆ.
ەسكە سالا كەتەلىك، بۇدان بۇرىن ءابيبا ءابۋجاقىنوۆا دزيۋدودان قازاقستاننىڭ ەڭبەك سىڭىرگەن سپورت شەبەرى اتاعىن العانىن حابارلاعان بولاتىنبىز.
