اتىراۋ وبلىسى كوكتەمگى سۋ تاسقىنىنا دايىندىقتى باستاپ كەتتى

اتىراۋ. KAZINFORM - اتىراۋ وبلىسىندا كوكتەمگى سۋ تاسقىنىنىڭ الدىن الۋ ءۇشىن دايىندىق باستالدى. قازىر ينجەنەرلىك جۇمىس جوسپارى بەكىتىلدى.

اتىراۋ وبلىستىق جۇمىلدىرۋ دايارلىعى جانە ازاماتتىق قورعاۋ باسقارماسىنىڭ ءبولىم باسشىسى بەكتۇرعان ماساتوۆتىڭ مالىمەتىنە سۇيەنسەك، بولۋى ىقتيمال تابيعي اپاتتىڭ الدىن الۋ جۇمىستارىنا 244 تەحنيكا مەن 3 تىكۇشاق جۇمىلدىرىلادى.

«بيىل تابيعي سيپاتتاعى توتەنشە جاعداي كەزىندە 10 كولىك- ينفراقۇرىلىم نىسانى بۇزىلدى. قازىر كەزدە سول نىسانداردى قالپىنا كەلتىرۋ ءجۇرىپ جاتىر. كوكتەمدە وبلىس اۋماعىندا 590,6 شاقىرىم بوگەت تۇرعىزىلدى. ەندى بۇل بوگەتتى وبلىستىڭ تەڭگەرىمىنە الىنادى»، - دەپ حابارلادى بەكتۇرعان ماساتوۆ.

ونىڭ ايتۋىنشا، الداعى كوكتەمدە بولۋى ىقتيمال سۋ تاسقىنىنا دايىندىق باستالعان. وسى كەزگە دەيىن 48,5 توننا جانار- جاعار ماي، 235 توننا ينەرتتى ماتەريال ازىرلەنگەن. سونداي-اق، 161 مىڭنان استام قاپشىق، 69 دانا شاتىر مەن 5 مىڭنان استام توسەك-ورىن جابدىعى دايىن تۇر.

«كوكتەمگە دەيىن بوگەتتىڭ ساپاسى تەكسەرىلەدى. بوگەتتىڭ وسال تۇستارى انىقتالسا، نىعايتۋ جوسپارلانىپ وتىر. مۇنىڭ ءبارى سۋ تاسقىنىنا دايىندىق بويىنشا بەكىتىلگەن ينجەنەرلىك جۇمىس جوسپارىنا سايكەس جۇرگىزىلەدى. جوسپارعا سايكەس جەم وزەنىنىڭ اعىنىن رەتتەۋ، تابيعي سيپاتتاعى توتەنشە جاعدايدى جويۋ جانە اۆاريالىق قالپىنا كەلتىرۋ جۇمىستارىن جۇرگىزۋ ماقساتىندا جۇمىس جوباسى جاسالدى. وندا جىلىوي اۋدانىنداعى جەم وزەنى مەن قۇرساي كانالىنىڭ ارناسىن، قامىسكول كولىن تازارتۋ قاراستىرىلدى. جەم وزەنىنىڭ جانە قۇلسارى قالاسىنىڭ اۋماعىمەن وتەتىن قۇرساي كانالىنىڭ جاعالاۋىندا قورعانىس بوگەتى ورناتۋ جۇمىستارى اتقارىلادى»، - دەپ ءمالىم ەتتى بەكتۇرعان ماساتوۆ.

وسى كەزگە قۇرساي كانالىنىڭ 32، ال، جەم وزەنىنىڭ 2 شاقىرىمىن تەرەڭدەتۋ جۇمىسى جۇرگىزىلگەن.

ەسكە سالا كەتەلىك، بۇعان دەيىن اتىراۋدا كوكتەمدە سالىنعان 590 شاقىرىم بوگەت وبلىستىڭ تەڭگەرىمىنە الىناتىنىن جازعان بولاتىنبىز.

اۆتور
جولداسبەك شوپەعۇل