اتىراۋ قالاسىنىڭ ەكس-اكىمى تەرگەۋ يزولياتورىنان ءۇي قاماققا جىبەرىلدى

اتىراۋ. KAZINFORM — اتىراۋ قالاسىنىڭ بۇرىنعى اكىمى قايرات ورازبايەۆ ۋاقىتشا تەرگەۋ يزولياتورىنان ءۇي قاماققا شىعارىلدى. مۇنداي شەشىم قابىلداۋعا بۇرىنعى اكىمنىڭ دەنساۋلىق جاعدايى سەبەپ بولعان.

وبلىستىق سوتتىڭ باسپا ءسوز قىزمەتى راستاعان دەرەككە قاراعاندا، ەكس-اكىم ءۇي قاماققا ءبىر اي بۇرىن شىعارىلعان.

«اتىراۋ قالاسىنىڭ مامانداندىرىلعان تەرگەۋ سوتىنىڭ 2023-جىلعى 11- قاراشاداعى قاۋلىسىمەن قايرات ورازبايەۆقا قاتىستى ەكى اي مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسى سانكسيالانعان ەدى. اتىراۋ وبلىسى پروكۋرورىنىڭ ءوتىنىشحاتى بويىنشا مامانداندىرىلعان تەرگەۋ سوتىنىڭ 2023-جىلدىڭ 22- جەلتوقسانداعى قاۋلىسىمەن ق. ورازبايەۆقا قاتىستى بۇلتارتپاۋ شاراسى ونىڭ دەنساۋلىق جاعدايىنا بايلانىستى ءۇي قاماق تۇرىندەگى بۇلتارتپاۋ شاراسىنا وزگەرتىلدى»، - دەپ حابارلادى سوتتىڭ باسپا ءسوز قىزمەتى.

ەسكە سالا كەتەلىك، بىلتىرعى قاراشادا اتىراۋ قالاسىنىڭ بۇرىنعى اكىمى قايرات ورازبايەۆ قاماۋعا الىندى.

وبلىستىق پروكۋراتۋرانىڭ باسپا ءسوز قىزمەتىنەن ءمالىم ەتكەندەي، اتىراۋ قالالىق اكىمدىگىنىڭ لاۋازىمدى تۇلعالارىنا قاتىستى الاياقتىق بەلگىلەرىمەن سوتقا دەيىنگى تەرگەپ-تەكسەرۋ باستالعان ەدى.

«2020-2022-جىلدار كەزەڭىندە اكىمدىكتىڭ لاۋازىمدى تۇلعالارى جەكە تۇرعىن ءۇي قۇرىلىستارى ءۇشىن رەكرەاتسيالىق ايماقتارعا، ونىڭ ىشىندە جاسىل جەلەك ايماقتارى، ساياباقتار، سكۆەرلەر، جاعالاۋلار جانە تاعى باسقا ساناتقا جاتاتىن جەر ۋچاسكەلەرىن زاڭسىز بەرگەنى انىقتالدى. وسىعان بايلانىستى بۇگىن ق ر قىلمىستىق كودەكسىنىڭ 190-بابى 4-بولىگىنىڭ 2-تارماعىندا كوزدەلگەن قىلمىستىق قۇقىق بۇزۋشىلىق جاسادى دەگەن كۇدىك بويىنشا تەرگەۋ شەڭبەرىندە اتىراۋ قالاسىنىڭ ەكس-اكىمى قايرات ورازبايەۆ ۇستالدى»، - دەپ ءمالىم ەتكەن ەدى پروكۋراتۋرانىڭ باسپا ءسوز قىزمەتىنەن.

كەيىن بۇرىنعى اكىم قايرات ورازبايەۆ ەكى اي قاماۋدا وتىراتىنىن جازعان ەدىك.

قايرات ورازبايەۆتىڭ - ماماندىعى مۇنايشى. ول ءبىراز جىل اتىراۋ مۇناي وڭدەۋ زاۋىتىندا جۇمىس ىستەپ، كەيىن باس ديرەكتورى بولعان. بۇدان سوڭ اتىراۋ قالاسىنىڭ اكىمى لاۋازىمىن اتقارعان.