اتىراۋ مۇناي وڭدەۋ زاۋىتىنىڭ بيۋجەتكە تولەيتىن سالىعى بىلتىرعىدان 1,5 ەسەگە ارتتى

اتىراۋ وبلىسىنداعى ءىرى سالىق تولەۋشىلەردىڭ قاتارىندا مۇناي وڭدەۋ زاۋىتى دا بار. بيىل وتاندىق كاسىپورىننىڭ بيۋجەتكە تولەيتىن سالىعى بىلتىرعىدان 1,5 ەسەگە ارتىپ وتىر، دەپ حابارلايدى Kazinform.

كاسىپورىننىڭ قوعاممەن بايلانىس ءبولىمى ۇسىنعان اقپاراتقا قاراعاندا، بيىل قاڭتار-قاراشا ايلارى ارالىعىندا زاۋىت 142 ميلليارد تەڭگەدەن استام سالىق تولەگەن. ونىڭ ىشىندە 22,2 ميلليارد تەڭگە رەسپۋبليكالىق بيۋجەتكە، ال، 120 ميلليارد تەڭگەدەن استامى جەرگىلىكتى قازىناعا تۇسكەن.

«بىلتىر اتىراۋ مۇناي وڭدەۋ زاۋىتىنان تۇسكەن سالىق تولەمدەرى اتىراۋ قالالىق اكىمدىگى بيۋجەتىندەگى جالپى شىعىستىڭ 33 پايىزىن قۇرادى. ەندى بيىل جىل سوڭىنا دەيىن كاسىپورىن بيۋجەتكە تولەيتىن سالىقتىڭ كولەمىن 154,7 ميلليارد تەڭگەگە جەتكىزۋدى جوسپارلاپ وتىر. ياعني، بىلتىرعى كورسەتكىشتەن 1,5 ەسە ارتتى»، - دەپ حابارلادى زاۋىتتىڭ قوعاممەن بايلانىس ءبولىمى.

زاۋىت باسشىلارىنىڭ ايتۋىنشا، سالىق تولەمدەرىنىڭ ۇلعايۋىنا اسەر ەتكەن بىرنەشە سەبەپ بار. بىرىنشىدەن، بۇل زاۋىتتا جۇرگىزىلگەن ءۇش كەزەڭدى جاڭعىرتۋدىڭ ەكونوميكالىق تيىمدىلىگىمەن بايلانىستى بولىپ وتىر.

ەكىنشىدەن، جاڭعىرتۋ جۇمىستارىنىڭ ناتيجەسىندە ديزەل وتىنى، بەنزين، كەروسين جانە پاراكسيلول سەكىلدى قوسىلعان قۇنى جوعارى اشىق ءتۇستى مۇناي ونىمدەرىن شىعارۋ كولەمى ارتقان.

ۇشىنشىدەن، سالىق تولەمدەرىنىڭ وسۋىنە بەنزين مەن ديزەل وتىنىنا اكتسيز ستاۆكالارىنىڭ كوتەرىلگەنى ىقپالى تيگەن.

ەسكە سالا كەتەلىك، بۇعان دەيىن اتىراۋ مۇناي وڭدەۋ زاۋىتى تولىق قۋاتىندا جۇمىس ىستەۋگە كوشكەنىن حابارلاعان ەدىك.