اتىراۋ فەلدشەرلەرى جۇكتى ايەلدى ۇيىندە بوساندىرىپ، ەگىزدىڭ ءومىرىن ساقتاپ قالدى

اتىراۋ. KAZINFORM - اتىراۋدا جەدەل جاردەم ستانساسىنىڭ فەلدشەرلەرى جۇكتى ايەلدى ۇيىندە بوساندىردى. ومىرگە ەگىز كەلدى.

اتىراۋ وبلىستىق مەديتسينالىق جەدەل جاردەم ستانساسى ديرەكتورىنىڭ ورىنباسارى نارگيز ابدراحمانوۆانىڭ مالىمەتىنشە، جىل باسىنان بەرى فەلدشەرلەر 49 جۇكتى انانى ۇيىندە بوساندىرعان. سونداي وقيعانىڭ ءبىرى كەشە، 29-جەلتوقساندا بولعان.

- جەدەل جاردەم ستانساسىنىڭ ديسپەدچەرلىك پۋلتىنە جۇكتى ايەلدەن شاقىرتۋ ءتۇستى. سوعان بايلانىستى №9-بريگادانىڭ فەلدشەرلەرى ەلۆيرا كاريموۆا مەن قانات جەكسەنبايەۆ شاقىرتۋ بەرىلگەن مەكەنجايعا جەتكەندە، جۇكتى ايەلدىڭ تولعاعى باستالعان. ءبىزدىڭ فەلدشەرلەر جۇكتى انانى ۇيىندە بوساندىرىپ، ەگىزدىڭ كىندىگىن كەستى. سودان سوڭ وبلىستىق پەريناتالدىق ورتالىققا جەتكىزدى، - دەيدى نارگيز ابدراحمانوۆا.

فەلدشەر ەلۆيرا كاريموۆا جەدەل جاردەم ستانساسىندا 11 جىلدان بەرى جۇمىس ىستەيدى. ال جاس فەلدشەر قانات جەكسەمبايەۆ بۇل سالاداعى جۇمىسىن بىلتىر باستاعان.

- ءبىز شاقىرتۋ بويىنشا ناۋقاستارعا ءجيى بارامىز. بىرنەشە جۇكتى انانى ۇيىندە بوساندىرۋعا قاتىستىق. الايدا ەگىزدىڭ ومىرگە كەلۋى العاش رەت كەزدەسىپ وتىر. مۇنداي جاعدايدا قوبالجۋ بولادى عوي. دەگەنمەن، جۇكتى انا ەگىز قىزدى امان-ەسەن بوساندى. ءبىرىنشىسىنىڭ كىندىگىن كەسكەندە، ەكىنشىسى دە ومىرگە كەلدى. بۇل - وسى جىلدىڭ ۇمىتىلمايتىن باستى وقيعاسى، - دەيدى ەلۆيرا كاريموۆا.

ەسكە سالا كەتەلىك، بۇدان بۇرىن اتىراۋ وبلىسىندا جىل باسىنان بەرى ومىرگە كەلگەن 10,5 مىڭ ءسابيدىڭ 482 سى شالا تۋعانىن حابارلاعان بولاتىنبىز.

اۆتور

جولداسبەك شوپەعۇل