اۆتومەكتەپتەرگە قويىلاتىن تالاپتار قايتا كۇشەيتىلۋى مۇمكىن
استانا. KAZINFORM - ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا اۆتومەكتەپتەرگە قويىلاتىن تالاپتاردىڭ السىرەۋ كولىك تىزگىندەۋشىلەردىڭ ساپاسىنا كەرى اسەر ەتكەنىن مويىندادى.
«اۆتومەكتەپتەردى ءوزىن-ءوزى رەتتەۋگە كوشىرۋ ءۇشىن زاڭنامانى كەزەڭ-كەزەڭىمەن السىرەتۋ وسى سالادا باقىلاۋدى جوعالتقانىن مويىندايمىز. بۇگىندە 747 وقۋ ورتالىعى جۇمىس ىستەپ تۇر. 2018 -جىلدان باستاپ اۆتومەكتەپ اشۋ ءۇشىن ليتسەنزيالار مەن رۇقساتتار قاجەت ەمەس. 2020 -جىلى ولاردىڭ قىزمەتىنە مەملەكەتتىك باقىلاۋ توقتاتىلدى. ساپاسىز دايىندىق ءۇشىن قولدانىلىپ كەلگەن اكىمشىلىك جاۋاپكەرشىلىك الىنىپ تاستالدى»، - دەدى قايسار سۇلتانبايەۆ.
ايتۋىنشا، وسىنىڭ سالدارىنان وقۋ پروتسەسىن قاعاز جۇزىندە جۇرگىزۋ بەلەڭ العان.
«كوپتەگەن مەكتەپتەردە قاجەتتى ماتەريالدىق بازا جوق. اۆتومەكتەپتەر قىزمەتى ءبىز كۇتكەندەي ءوزىن-ءوزى رەتتەي العان جوق. وسى قىزمەتتىڭ بارلىق باعىتتارىندا دايىندىق پەن جاراقتاندىرۋ ساپاسىنىڭ تومەندەگەنىن بايقاپ وتىرمىز. سوندىقتان، قازىر سالاعا ءتارتىپ ورناتۋ شارالارىن قابىلداپ جاتىرمىز»، - دەدى كوميتەت باسشىسى.
