اۆتوكولىككە كاپوتتى تىركەگەن: ورالدا 17 جاستاعى قىز قازا تاپتى

ورال قالاسىندا اۆتوكولىككە كاپوتتى( اۆتوموبيلدىڭ قوزعاۋىشى بولىگىن سىرتىنان جاباتىن قاقپاق) تىركەپ، سىرعاناعان 17 جاسار قىز قازا تاپتى، دەپ حابارلايدى Kazinform.

ب ق و پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى، پوليتسيا پودپولكوۆنيگى بولات جاڭابايەۆتىڭ ايتۋىنشا، وقيعا 5-قاڭتار كۇنى قالاعا قاراستى ۆەتەلكي اۋىلىندا بولدى.

ونىڭ سوزىنە قاراعاندا، ساعات 23.41-دە 17 جاسار قىز وبلىستىق كوپبەيىندى بالالار اۋرۋحاناسىنا جەتكىزىلگەنىمەن، ەسىن جيماستان كوز جۇمعان.

«پوليتسيا قىزمەتكەرلەرى انىقتاعانىنداي، قىز دوستارىمەن بىرگە اۆتوكولىككە تىركەلگەن ەسكى كاپوتقا وتىرىپ، سىرعاناعان. سودان گاز باعاناسىنا سوعىلعان. جۇرگىزۋشى كۋالىگى جوق جاس ءوسپىرىم اباي كوشەسىندە جول ەرەجەسىن ساقتاماي، «ۆاز-2107» اۆتوكولىگىنە كاپوتتى تىركەگەن. قازىرگى كەزدە وقيعانىڭ ءمان-جايى انىقتالۋ ۇستىندە»، - دەدى ب. جاڭابايەۆ.

ب ق و پوليتسيا دەپارتامەنتىنەن تۇسكەن مالىمەتكە قاراعاندا، جاڭا جىلدىڭ العاشقى اپتاسىندا وبلىستا جول اپاتتارى سالدارىنان 7 ادام قايتىس بولدى.

ەسكە سالا كەتەيىك، بۇدان بۇرىن باتىس قازاقستاندا جول اپاتىنان ءۇش ادامنىڭ كوز جۇمعانىن جازعان بولاتىنبىز. سونداي-اق تاعى ءبىر جول اپاتىنان 1 ادام مەرت بولىپ، 4 ەۋى جاراقات الدى.