اۆتوبۋس قۇردىمعا قۇلاعان مايقايىڭ كەنتىندەگى كاسىپورىندار بيۋدجەتكە قانداي پايدا اكەلىپ وتىر
پاۆلودار. KAZINFORM - مايقايىڭ - ەرەكشەلىگى باسىم ەلدى مەكەن. ەرەكشە دەيتىنى سول، 9 مىڭنان اسا حالىقتىڭ بەرەكەسىنە اينالعان الەمگە ايگىلى التىن كەنىشى وسىندا ورىن تەپكەن. بيىل مايقايىڭنىڭ، ونداعى تاۋ-كەن ءوندىرىسىنىڭ العاش ءوز الدىنا قۇرىلعانىنا 92 جىل تولادى.
مايقايىڭ ءوز الدىنا ەلدى مەكەن بولعالى ونىڭ ەكونوميكاسى جەراستى بايلىعىنا تاۋەلدى. التىن كەنىشى جەرگىلىكتى حالىقتى اسىراپ وتىر.
«مايقايىڭ التىن» اكسيونەرلىك قوعامى ەرتىستىڭ پاۆلودار وڭىرىندەگى ەڭ العاش قۇرىلعان تاۋ-كەن ءوندىرىسى ەكەنىن دە اتاپ وتكەن ابزال. ونداعى كەنىشكە تۇڭعىش ەكسكاۆاتور 1940 -جىلى تۇسىرىلگەن ەكەن. ول بۋمەن جۇمىس ىستەيتىن ەدى. بۇگىندە كاسىپورىنعا ەكى كەنىش جانە كەن- بايىتۋ فابريكاسى قارايدى. جەرگىلىكتى حالىقتىڭ دەنى بۇگىندە التىن وندىرىسىندە ەڭبەك ەتەدى.
- مايقايىڭ كەنتىنىڭ اكىمشىلىك اۋماعىنا مايكوبە، سۇلۋجون، ءۇشقۇلىن، شوپتىكول اۋىلدارى كىرەدى. بۇگىندە كەنت پەن وعان قاراستى اۋىلداردا «مايقايىڭ التىن» ا ق-نان بولەك، پايدالى قازبالار وندىرۋمەن 5 بىردەي كاسىپورىن اينالىسادى. ولار - كومىر وندىرەتىن «مايكۋبەن ۆەست» اكسيونەرلىك قوعامى، «قازاقستان اليۋمينيى» ا ق فيليالى - «كەرەگەتاس» كەنىشى، «مايقايىڭ اقتاس ءوندىرۋ زاۋىتى» ج ش س، «پنيەۆموسوققىش بۇرعىلاۋ» عىلىمي وندىرىستىك كاسىپورنى» ج ش س، «IBM Gold» ج ش س، - دەپ اتاپ كورسەتتى باياناۋىل اۋدانىنىڭ اكىمى ارداق كىسەنتايەۆ Kazinform اگەنتتىگىنىڭ تىلشىسىنە بەرگەن جاۋابىندا.
بىلتىر «مايقايىڭ التىن» ا ق اۋداندىق بيۋدجەتكە 840 ميلليون 714 مىڭ تەڭگە سالىق تولەگەن. ەڭ ۇلكەن سالىق تولەۋشى - «مايكۋبەن ۆەست» ا ق، وتكەن جىلى بۇل ءوندىرىس ورنى جەرگىلىكتى قازىناعا 1 ميلليارد 681,3 ميلليون تەڭگە قارجى قۇيعان.
سونىمەن قاتار، جەردى پايدالانعانى ءۇشىن 2023 -جىلى كەلەسىدەي قوسىمشا سالىق تولەنگەن:
- «مايقايىڭ التىن» ا ق - 6 ميلليون 739 مىڭ تەڭگە؛
- «مايكۋبەن ۆەست» ا ق - 46 ميلليون 314 مىڭ تەڭگە؛
- «كەرەگەتاس» كەنىشى - 8 ميلليون 329 مىڭ تەڭگە؛
- «پنەۆموسوققىش بۇرعىلاۋ» ج ش س - 1 ميلليون 531 مىڭ تەڭگە؛
- «گراۆەليت» ج ش س - 192 مىڭ تەڭگە.
سوڭعى اتالعان ەكى كاسىپورىن جەرگىلىكتى كاسىپكەر تيمۋر قابدۋلوۆقا تيەسىلى. ول - «مايقايىڭ التىن» ا ق باس ديرەكتورىنىڭ كەڭەسشىسى ورىنجان قابدۋلوۆتىڭ ۇلى.
اۆتور
مۇرات اياعان
