اۆتوبۋس جۇرگىزۋشىسى جولدا تەلەفونمەن سويلەسكەنى ءۇشىن ايىپپۇل ارقالادى

پاۆلودار. KAZINFORM - پاۆلوداردا اۆتوبۋس جۇرگىزۋشىسى ءجۇرىپ كەلە جاتىپ بەينەقوڭىراۋمەن سويلەسكەنى ءۇشىن ايىپپۇل ارقالادى

وبلىس ورتالىعىنداعى اۆتوبۋستاردىڭ بىرىندە جۇرگىزۋشى رۋلدە كەلە جاتىپ، ۇيالى تەلەفون ارقىلى بەينەكونفەرەنسيا وتكىزگەن. تەلەفونعا ءجيى قاراعىشتاپ جولاۋشىلاردىڭ قاۋىپسىزدىگىنە قاۋىپ توندىرگەن.

- كۇن سايىن اۆتوبۋستاردىڭ، مارشرۋتكالاردىڭ جانە ترامۆايلاردىڭ جۇرگىزۋشىلەرى تەلەفونعا الاڭداپ، جولاۋشىلاردىڭ ءومىرىن قاتەرگە تىگەتىنىن كورەمىز. جاقىندا قالا تۇرعىندارىنىڭ ءبىرى اۆتوبۋستا كەلە جاتىپ جۇرگىزۋشىنىڭ رۋلدە وتىرىپ بەينەكونفەرەنسيا وتكىزگەنىن كورگەن. ول داۋىس كوتەرە سويلەسىپ، قاتتى كۇلگەن. جولاۋشىلار ءوز ومىرلەرى ءۇشىن الاڭداعاندارىن ايتادى، - دەپ حابارلادى وڭىرلىك پوليتسيا دەپارتامەنتىنەن.

پوليتسيا قىزمەتكەرلەرى قۇقىق بۇزۋشىنى انىقتاپ، اكىمشىلىك جاۋاپكەرشىلىككە تارتقان. ءتارتىپ ساقشىلارىنىڭ ايتۋىنشا، جىل باسىنان كولىك جۇرگىزۋ كەزىندە سمارتفون پايدالانعانى ءۇشىن 2360 جۇرگىزۋشى جاۋاپكەرشىلىككە تارتىلعان.

ەسكە سالا كەتەيىك، پاۆلوداردا اۆتوبۋس پەن جەڭىل كولىكتىڭ سوقتىعىسۋىنان 7 ادام زارداپ شەككەن بولاتىن.