ناتو اسكەري كوميتەتىن نەمىس گەنەرالى كارستەن برويەر باسقارادى
استانا. KAZINFORM - بۋندەسۆەردىڭ باس ينسپەكتورى جانە گەرمانيا ارمياسىنداعى ەڭ جوعارى لاۋازىمدى اسكەري وفيتسەر، گەنەرال كارستەن برويەر كەلەسى جازدان باستاپ ناتو اسكەري كوميتەتىن باسقارادى، دەپ حابارلايدى BBC.
كوميتەتتىڭ قازىرگى باسشىسى، يتالياندىق ادميرال كاۆو دراگونە X جەلىسىندە حابارلاعانداي، برويەر بۇل لاۋازىمعا كوپەنگاگەندە وتكەن بارلىق 32 وداقتاس ەلدىڭ قارۋلى كۇشتەرىنىڭ جوعارعى باس قولباسشىلارىنىڭ كەزدەسۋىندە سايلانعان.
- ءسىزدىڭ جەدەل پايىمداۋىڭىز، وداق تۋرالى تەرەڭ ءبىلىمىڭىز جانە نەمىس قارۋلى كۇشتەرىن باسقارۋ تاجىريبەڭىز ناتوعا جاقسى قىزمەت ەتەدى. قورعانىس باسشىلارى سىزگە ەۋرواتلانتيكالىق قاۋىپسىزدىك ءۇشىن سىناق كەزىندە سەنىم ارتتى، - دەدى ول برويەردى قۇتتىقتاي وتىرىپ.
اسكەري كوميتەت - ناتونىڭ ەڭ جوعارى اسكەري ورگانى. ال ونىڭ ءتوراعاسى لاۋازىمى بويىنشا اليانستىڭ باس حاتشىسىنىڭ باس اسكەري كەڭەسشىسى قىزمەتىن اتقارادى. باس حاتشى قىزمەتىن ءداستۇرلى تۇردە ەۋروپا ەلدەرىنەن نەمەسە كانادادان كەلگەن تاجىريبەلى ساياساتكەرلەر اتقارادى.
بۇعان دەيىن ليتۆا ناتونىڭ يادرولىق تەجەۋ جۇيەسىنە قوسىلۋعا نيەتتى ەكەنىن جازعان بولاتىنبىز.
