پاتەر كىلتىن ەسىكتە ۇمىتىپ كەتكەن استانالىق ۇرىنىڭ ۇستىنەن ءتۇستى

استانا تۇرعىنى ۇيىنەن شىعىپ بارا جاتىپ، ابايسىزدا كىرەبەرىس ەسىكتىڭ سىرتىندا پاتەرىنىڭ كىلتىن قالدىرىپ كەتكەن. ۇيىنە قايتىپ كەلگەندە پاتەر ىشىندە بەيتانىس ەر ادام جۇرگەن. ءۇي يەسى ەسىكتى قاعىپ، ەر ادامنان پاتەردەن شىعۋىن تالاپ ەتكەن. كەيىن ەسىك اشىلىپ، ەر ادام پاتەردەن جۇگىرىپ شىعىپ، ءىزىن سۋىتقان. ال ايەل دەرەۋ پوليتسياعا حابارلاسقان.

تەرگەۋ بارىسىندا پاتەردەن زەرگەرلىك بۇيىمداردىڭ ۇرلانعانى انىقتالدى.

«گاۋھار تاستارى بار ءتورت التىن ساقينا، ءۇش التىن القا جانە ءۇش جۇپ التىن سىرعا ۇرلانعان. كەلتىرىلگەن جالپى شىعىن 3,5 ميلليون تەڭگەدەن استى»، - دەپ مالىمدەدى ىشكى ىستەر مينيسترلىگى.

جەدەل- ىزدەستىرۋ شارالارىنىڭ ناتيجەسىندە پوليتسيا قىزمەتكەرلەرى 25 جاستاعى كۇدىكتىنى انىقتاپ، ۇستادى. ول بۇعان دەيىن دە وسىنداي قىلمىس جاساعانى ءۇشىن جاۋاپقا تارتىلعان. ۇرلانعان مۇلىك تاركىلەنىپ، يەسىنە قايتارىلدى.

قازىر سوتقا دەيىنگى تەرگەۋ جۇرگىزىلىپ، وقيعانىڭ بارلىق ءمان- جايى انىقتالىپ جاتىر.

پوليتسيا ازاماتتاردى مۇلىكتىڭ قاۋىپسىزدىگىنە مۇقيات بولۋعا جانە كىلتتى قۇلىپتا نەمەسە وڭاي جەردە قالدىرماۋعا شاقىرادى.

Stan.kz