اتاقتى فۋتبولشى توماس ميۋللەردىڭ جىلقىسى وليمپيادادا توپ جاردى

استانا. قازاقپارات - گەرمانيا قۇراماسى مەن ميۋنحەننىڭ «باۆاريا» كلۋبىنىڭ جۇلدىزدى شابۋىلشىسى توماس ميۋللەردىڭ جىلقىسى پاريجدە ءوتىپ جاتقان جازعى وليمپيادا ويىندارىندا توپ جاردى.

34 جاستاعى فۋتبولشىنىڭ جىلقىلارعا قىزىعۋشىلىعى ارتقانىنا ءبىراز بولدى، ال 2021 -جىلدان باستاپ بۇل حوببي ونىڭ كاسىبىنە اينالدى. ميۋللەر ايەلىمەن بىرگە Gut Wettlkam دەپ اتالاتىن جىلقى فەرماسىن اشتى. ميۋللەردىڭ جۇبايى ليزانىڭ ءوزى كاسىبي تۇردە ات سپورتىمەن اينالىسادى.

قازىرگى ۋاقىتتا فۋتبولشىنىڭ بىرنەشە تۇلپارى وليمپيادا ويىندارىنا قاتىسىپ جاتىر. سونىڭ ىشىندە كريستيان كۋكۋك مىنگەن چەكەر ەسىمدى جىلقى جەكەلەي سىندا گەرمانياعا التىن مەدال سىيلادى.

«وسى جىلقىمەن جارىسقا قاتىسۋعا مۇمكىندىك بەرىلدى. بۇل كەرەمەت ءسات بولدى. چەكەردى ماقتان تۇتامىن»، - دەدى شاباندوز كريستيان كۋكۋك.

ەكىنشى ورىن شۆەيتساريانىڭ سپورتشىسى ستيۆ گەرداعا بۇيىرسا، ءۇشىنشى ورىندى نيدەرلاند وكىلى مايكەل ۆان دەر فليۋتەن يەلەندى.

ايتا كەتەيىك، توماس ميۋللەر گەرمانيا قۇراماسىنداعى مانسابىن اياقتايتىنىن رەسمي تۇردە مالىمدەگەن ەدى. ول ۇلتتىق قۇراماداعى سوڭعى ماتچىن ەۋروپا چەمپيوناتىنىڭ شيرەك فينالىندا وتكىزدى. بۇل ويىندا گەرمانيا يسپانيادان 1:2 ەسەبىمەن جەڭىلىپ قالعان بولاتىن.