اتاقتى فۋتبولشى مارادونانىڭ بالالارى سوتقا شاعىمداندى
استانا. KAZINFORM - ارگەنتينانىڭ باعىنا تۋعان داڭقتى سپورتشى ديەگو مارادونانىڭ مۇراگەرلەرى 1986 -جىلعى الەم چەمپيوناتىندا فۋتبولشىعا بەرىلگەن «التىن دوپتىڭ» اۋكتسيونعا قويىلۋىنا قارسى شىعىپ، سوتقا شاعىمداندى.
الەم چەمپيوناتىنىڭ ۇزدىك ويىنشىسىنا بەرىلەتىن «التىن دوپ» جۇلدەسى جۇمباق جاعدايدا جوعالىپ كەتكەن ەدى. ونداعان جىلدار بويى تابىلماعان جۇلدە جۋىردا اياقاستى پايدا بولىپ، ءتىپتى 6-ماۋسىمدا پاريجدە اۋكتسيونعا شىعارىلاتىنى حابارلاندى.
مارقۇم مارادونانىڭ مۇراگەرلەرى جۇلدەنىڭ قازىرگى يەسى كۋبوكتى ساتۋعا قۇقىعى جوق ەكەنىن العا تارتىپ وتىر. اتاقتى فۋتبولشىنىڭ ەكى قىزىنىڭ مۇددەسىن قورعايتىن ادۆوكات جيللەس موريەر نانتەر سوتىنىڭ ءتوراعاسىنان «التىن دوپتى» اۋكتسيوننان الىپ تاستاۋدى سۇرايتىنىن ايتتى. سونداي- اق ول جۇلدەنى ۇرلاۋ بويىنشا شاعىمداناتىنىن جەتكىزدى.
بولجامدارعا سايكەس، بۇل جۇلدە قارىزدى وتەۋ ءۇشىن ساتىلعان بولۋى مۇمكىن. تاعى ءبىر بولجامعا سۇيەنسەك، نەاپول بانكتەرىنىڭ ءبىرىنىڭ سەيفىندە ساقتالعان جۇلدەنى جەرگىلىكتى قىلمىستىق توپتار ۇرلاپ كەتكەن.
مارادونانىڭ قىزدارى كۋبوكتىڭ ۇرلانعانىن جاقىندا عانا بىلگەنىن العا تارتىپ وتىر. ادۆوكاتتىڭ ايتۋىنشا، فۋتبولشىنىڭ وتباسى «التىن دوپتى» وزدەرىنە تيەسىلى دەپ سانايتىندىقتان، ونىڭ ساتىلۋىنا قارسى.
Aguttes اۋكتسيون ءۇيى باسشىلىعىنىڭ ايتۋىنشا، جۇلدەگە يەلىك ەتكەن ادام ونىڭ ۇرلانعانىن بىلمەگەن.
ساراپشىلار ەگەر جۇلدە اۋكتسيوندا ساتىلسا، بىرەگەيلىگىنە بايلانىستى كوپ تابىس اكەلەتىنىن بولجاپ وتىر. دەسە دە، بۇل ىسكە قاتىستى سوت قانداي شەشىم شىعاراتىنى ءالى بەلگىسىز.
ەستەرىڭىزگە سالساق، مارادونا 2020 -جىلى 25-قاراشادا 60 جاسىندا قايتىس بولدى. ف ي ف ا رەسمي سايتىنداعى داۋىس بەرۋ ناتيجەسى بويىنشا ارگەنتينالىق 20 - عاسىردىڭ ۇزدىك فۋتبولشىسى بولىپ تاڭدالعان بولاتىن.
بۇعان دەيىن ديەگو مارادونا 36 جىل بۇرىن داۋلى گول سوققان دوپ اۋكتسيونعا شىعارىلعان ەدى.
