اتامەكەنگە ورالعان قانداستار

  بيىل قازان ايىندا وتكەن وتانداستار فورۋمىنا قاتىسۋشىلارعا ارنالعان سەزدە پرەزيدەنت: «ءبىز شەتەلدە تۇراتىن قانداستارىمىزدى قولداۋعا قاشاندا ءمان بەرەمىز. ولاردىڭ تاريحي وتانىنا قونىس اۋدارۋىنا تولىق جاعداي جاسالعان»، دەگەن ەدى.

قازاقستانعا كىندىك قانى اتاجۇرتتان تىس جەردە تامعانىمەن، قازاقستانعا ورالۋدى اڭساپ جۇرگەن قانداستار ءالى دە كوپ. ماسەلەن، اتىراۋ وبلىسىنا 1-جەلتوقسانعا دەيىن شەتەلدەن 212 وتباسى كوشىپ كەلدى. قازاقستاندا تۇراقتى تۇرۋ ماقساتىمەن ورالعان 272 ەتنوستىق قازاققا قانداس مارتەبەسى بەرىلدى.

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسپا ءسوز قىزمەتىنىڭ مالىمەتىنە سۇيەنسەك، اتامەكەنگە كوشىپ كەلگەن قانداستاردى ۋاقىتشا ورنالاستىرۋ ورتالىعى اشىلعان. مۇندا قولداۋدىڭ بارلىق ءتۇرى كورسەتىلەدى.

اتامەكەنگە ورالىسىمەن مۇنايلى ءوڭىردى تاڭداعان قانداستاردىڭ باسىم بولىگى - 171 وتباسىنداعى 218 قازاق بۇرىن وزبەكستاندا تۇرعان. رەسەي فەدەراتسياسىنان 35 وتباسى (44 ادام) ، قىتاي حالىق رەسپۋبليكاسىنان ءبىر وتباسى (ءبىر ادام)، تۇرىكمەنستاننان ءۇش وتباسى (جەتى ادام) جانە موڭعوليادان ەكى وتباسى (ەكى ادام) ورالىپ وتىر. قانداستاردىڭ اراسىنان 180 وتباسى اتىراۋ قالاسىنا قونىستانۋعا نيەت ءبىلدىرىپتى. ال جىلىوي اۋدانىنا – 27، ماقاتقا – 4، يندەر اۋدانىنا ءبىر وتباسى كوشىپ بارعان.

وڭىردە اتامەكەندى اڭساپ جەتكەن قانداستاردىڭ باسپانامەن قامتىلۋىنا دا قولداۋ كورسەتىلىپ وتىر. قازىر تۇرعىن ءۇي كەزەگىندە 43 قانداس تىركەۋدە تۇر. جۇمىسپەن قامتۋ ورتالىقتارىندا 22 قانداس جۇمىسسىز رەتىندە تىركەلدى. تۇراقتى جۇمىسقا ءبىر قانداس ورنالاستى. جۇمىسسىزدار ەسەبىنە الىنعان ءتورت قانداس «باستاۋ بيزنەس» جوباسىمەن ارنايى وقىتۋ كۋرسىنان ءوتىپ، سەرتيفيكات العان.

اتىراۋ وبلىسى

جولداسبەك كوشەرباي ۇلى

egemen.kz