اتا زاڭدا ايقىندالعان قاعيداتتار ءار بالاعا بىردەي مۇمكىندىك بەرۋى ءتيىس - بەكتەنوۆ
استانا. KAZINFORM - وسكەلەڭ ۇرپاق تاربيەسىندە مەكتەپ پەن وتباسىنىڭ بىرلەسكەن جۇمىسى ماڭىزدى. بۇل تۋرالى ۇكىمەت وتىرىسىندا پرەمەر- مينيستر ولجاس بەكتەنوۆ ءمالىم ەتتى.
- جاڭا كونستيتۋتسيادا ەڭبەكسۇيگىشتىك، پروگرەسس جانە ءبىلىم قۇندىلىقتارى نەگىزگى قاعيداتتار رەتىندە بەكىتىلگەن. اسىرەسە، ءبىلىم مەن ادام كاپيتالىن دامىتۋعا ايرىقشا ءمان بەرىلىپ وتىر. اتا زاڭىمىزدا ايقىندالعان قاعيداتتار وقىتۋ ساپاسى مەن وسكەلەڭ ۇرپاق تاربيەسىنەن ناقتى كورىنىس تاۋىپ، ءار بالاعا بىردەي مۇمكىندىك بەرۋگە ءتيىس. سوندىقتان ءبىزدىڭ مىندەتىمىز - جاڭا وقۋ جىلىن دۇرىس ۇيىمداستىرىپ قانا قويماي، بالالاردىڭ ساپالى ءبىلىم الۋى مەن جان-جاقتى دامۋىنا قاجەتتى جاعداي جاساۋ. مەملەكەت باسشىسى بالالار مەن جاستاردىڭ بويىندا جاڭا كونستيتۋتسيادا بەكىتىلگەن قۇقىقتىق مادەنيەت پەن ازاماتتىق جاۋاپكەرشىلىكتى قالىپتاستىرۋعا، «زاڭ مەن ءتارتىپ» قاعيداتىنىڭ ساقتالۋىنا باسا نازار اۋدارىپ كەلەدى، - دەدى و. بەكتەنوۆ.
ونىڭ ايتۋىنشا، جالپى العاندا، تاربيە جۇمىسى «ادال ازامات» ءبىرىڭعاي باعدارلاماسىنا جانە «تازا قازاقستان» جالپىۇلتتىق باستاماسىنا نەگىزدەلۋگە ءتيىس. ونىڭ اياسىندا ەكولوگيالىق مادەنيەت پەن قورشاعان ورتاعا قامقورلىق سياقتى ومىرلىك ۇستانىمداردى ورنىقتىرۋعا نازار اۋدارۋ كەرەك.
- بۇل ىستە مەكتەپ پەن وتباسىنىڭ بىرلەسكەن جۇمىسى ماڭىزدى. ءاربىر تاربيە شاراسى ناقتى ناتيجە بەرۋى قاجەت،-دەدى ۇكىمەت باسشىسى.
بۇعان دەيىن حابارلانعانداي، بيىل 1-سىنىپقا 380 مىڭنان استام بالا قابىلدانادى.
