اتا-انالاردىڭ 17 پايىزى عانا بالالارىنىڭ اككاۋنتتارىن باقىلاپ وتىر - مينيسترلىك

استانا. KAZINFORM - ويىن بيزنەسى تۋرالى زاڭ جوباسى اياسىندا ەلىمىزدە بۋكمەكەرلىك كەڭسەگە تىركەلۋ ءۇشىن جاسى 25تەن اسۋ كەرەك. بۇل تۋرالى ءماجىلىس دەپۋتاتى ەلنۇر بەيسەنبايەۆ ايتتى.

ونىڭ ايتۋىنشا، بۇل دەرت بالالار مەن جاس وسپىرىمدەردى دە شارپىپ وتىر.

قۇقىق قورعاۋ ورگاندارىنىڭ مالىمەتىنشە، شامامەن 200 مىڭعا جۋىق كامەلەت جاسىنا تولماعان بالا باسقا ادامنىڭ اتىنان بۋكمەكەرلىك كەڭسەلەرگە ءباس تىگىپ، قۇمار ويىندار وينايدى ەكەن.

«ول بالالاردىڭ وزدەرىنىڭ اككاۋنتتارى جوق، ياعني وزگە اككاۋنتتار ارقىلى ويناعان. سونداي-اق بۇل جاس وسپىرىمدەر دەرەكتەردى وزگەرتىپ، ياعني 21 جاسقا تولعان ادام رەتىندە ويىنعا قاتىسقان نەمەسە اعاسىنىڭ جانە باسقا تۋىستارىنىڭ اككاۋنتتارىن پايدالانعان. بۇل اككاۋنتتارعا QIWI كوشەلەك ارقىلى قاراجات سالىپ، ويىندارىن جۇرگىزگەن. سوندىقتان زاڭ اياسىندا بۋكمەكەرلىك كەڭسەلەرگە اتالعان كوشەلەكتەر ارقىلى قاراجات تولتىرۋعا تىيىم سالامىز. ياعني، تەك كارتا ارقىلى قارجى سالۋعا بولادى. ەندى بۋكمەكەرلىك كەڭسەگە تىركەلۋ ءۇشىن جاسى 25 تەن اسۋ كەرەك جانە بورىشكەرلەر تىزىمىندە اتى-ءجونى بولماۋى قاجەت»، - دەدى ە. بەيسەنبايەۆ ماجىلىستە تىلشىلەر سۇراعىنا جاۋاپ بەرە وتىرىپ.

سونداي-اق مەملەكەتتىك قىزمەتشىلەردىڭ، قۇقىق قورعاۋ جانە اسكەري قىزمەتكەرلەردىڭ ءباس تىگۋىنە تىيىم سالۋ ەسكەرىلگەن. زاڭ جوباسىندا بۋكمەكەرلىك كەڭسەلەردە ءباس تىگۋ، اقشا الۋ جانە تولەۋ كەزىندە قاتىسۋشىلاردى بەينە-بيومەتريكالىق يدەنتيفيكاتسيادان وتكىزۋ مىندەتتەلەدى.

«مۇنىمەن قوسا، جەكە كۋالىك پەن بانك ەسەپ-شوتىنداعى مالىمەتتەردىڭ سايكەستىگى تەكسەرىلەدى. تەك وسى مالىمەتتەر سايكەس بولعان جاعدايدا عانا ويناۋعا رۇقسات ەتىلەدى. ەگەر وسى جۇيەگە قوسىلماعان بۋكمەكەرلىك كەڭسەلەر انىقتالسا، ولاردىڭ جۇمىسى زاڭسىز دەپ تانىلادى»، - دەدى دەپۋتات.

سونىمەن قاتار، ق ر وقۋ-اعارتۋ ۆيتسە-ءمينيسترى ەدىل وسپان ەلىمىزدە اتا-انالاردىڭ كوبىسى بالالارىنىڭ سمارتفوندارىن باقىلامايتىنىن ايتتى.

«دەنساۋلىق ساقتاۋ مينيسترلىگىنىڭ اقپاراتىنا سايكەس، جاس وسپىرىمدەر اراسىندا لۋدومانيا دەرتىنەن ەمدەلىپ جاتقاندار تىركەلمەگەن. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە قاراعاندا، لۋدومانيا - ول اۋرۋدىڭ ءبىر ءتۇرى. ونىمەن كۇرەسۋدىڭ ەكى پروفيلاكتيكالىق دەڭگەيى بار. ءبىرىنشىسى – جاس وسپىرىمدەرگە قۇمار ويىننىڭ كەسىرى تۋرالى ءتۇسىندىرۋ. ەكىنشىدەن، وسىعان شالدىققان بالالارعا قاتىستى پسيحولوگيالىق جۇمىستاردى جالعاستىرۋ ەسكەرىلگەن. ءبىلىم بەرۋ جۇيەسى ءبىرىنشى دەڭگەيدە پروفيلاكتيكانى اتقارادى. 2023-جىلى بالالاردىڭ قۇمار ويىندار مەن كومپيۋتەرلىك ويىندارعا تاۋەلدىلىگىنەن ساقتاۋعا قاتىستى ارنايى جول كارتاسى قابىلداندى. 2023-جىلى جۇرگىزىلگەن الەۋمەتتىك زەرتتەۋلەرگە سايكەس، اتا-انالاردىڭ تەك 17 پايىزى بالالارىنىڭ اككاۋنتتارىنا باقىلاۋ جاسايتىن ارنايى قوسىمشالاردى ورناتقان. وسى باعىتتاعى جۇمىستى كۇشەيتۋ ءۇشىن اتا-انالاردى قولداۋ ورتالىقتارى اياسىندا ولاردى مەكتەپتەرگە شاقىرىپ، بالالاردىڭ سمارتفونىنداعى اككاۋنتتاردى قاداعالاۋعا الۋ بويىنشا تاسىلدەر تۇسىندىرىلەدى»، - دەدى ە. وسپان.

ايتا كەتەيىك، بۇگىن ءماجىلىستىڭ جالپى وتىرىسىندا دەپۋتات ەلنۇر بەيسەنبايەۆ كەيىنگى ەكى جارىم جىلدا ەلىمىزدىڭ شامامەن ءاربىر بەسىنشى ادامى ويىن وينايدى ەكەن نەمەسە قۇمار ويىندارىنا قانداي دا ءبىر قاتىسى بار. ال، ونىڭ ىشىندە 400 مىڭداي ادام ويىنعا سالىنىپ، بۋكمەكەرلىك كەڭسەلەر مەن كازينولاردىڭ تۇراقتى كليەنتىنە اينالعان. وزگە ادامنىڭ لوگينىمەن بۋكمەكەرلىك كەڭسەلەرگە ءباس تىگۋشى ادامداردىڭ سانى بەلگىسىز.