اتا-انا قۇقىعىنان شەتتەتىلگەن ايەل بالاسىمەن قايتا قاۋىشتى

استانا. قازاقپارات - 2022 -جىلى 5 جاسار بالانىڭ اناسىنىڭ اتا-انالىق قۇقىعى شەكتەلىپ، بالا بالالار ۇيىنە بەرىلگەن. 2023 -جىلى بالانىڭ اناسى اتا-انا قۇقىعىن قالپىنا كەلتىرىپ، بالاسىن قايتارۋ تۋرالى سوتقا جۇگىگەن، ونىڭ ارىزى قاناعاتتاندىرىلىپ، بالا مەن انا قايتا قاۋىشتى.

2022 -جىلى 5 جاسار بالانىڭ اناسىنىڭ اتا-انالىق قۇقىعى شەكتەلىپ، اكەسى - ول قۇقىنان ايىرىلعان. اتا-انالار بالالارىنا ونى اسىراۋعا اليمەنت تولەۋگە مىندەتتەلدى. بالا مامانداندىرىلعان بالالار ۇيىنە، كەيىن ەرلى-زايىپتىلاردىڭ قامقورشىلارىنا بەرىلدى.

- 2023 -جىلى بالانىڭ اناسى اتا-انا قۇقىعىن قالپىنا كەلتىرىپ، بالاسىن قايتارۋ تۋرالى تالاپپەن سوتقا جۇگىنگەن. سوتتا ول ۇلى ءوزىنىڭ ءومىرىن وزگەرتۋگە جانە دەنساۋلىعىن قالپىنا كەلتىرۋگە بىردەن-ءبىر ستيمۋل ەكەنىن ايتقان. تۇراقتى جۇمىس تاپقانىن، ەسىرتكى قولدانۋدان باس تارتقانىن، ناركولوگيالىق ورتالىقتىڭ ەسەپتەن شىعارىلعانىن ايتقان، - دەلىنگەن سوت حابارلاماسىندا.

سونداي-اق ول ءوزىنىڭ جىبەرگەن قاتەلىكتەرىن تۇزەتۋگە تىرىساتىنىن، ۇجىمنىڭ سەنىمى مەن قۇرمەتىنە يە بولعانىن جانە كۇش-جىگەرىنىڭ ارقاسىندا مەدبيكەدەن ساتۋشى كونسۋلتانتىنا دەيىن كوتەرىلگەنىن اتاپ وتكەن.

- ۇسىنىلعان قۇجاتتار ونىڭ پسيحياتريالىق ديسپانسەردە ەسەپتە تۇرماعانىن، رەسمي تۇردە جۇمىس ىستەيتىنىن، تۇراقتى تابىسى بارىن جانە سوتتىلىعىنىڭ جوقتىعىن راستادى. استانا قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى ءىستى زەرتتەي كەلە، جۇمىس بەرۋشى مەن پوليتسيا قىزمەتكەرلەرىنىڭ وڭ انىقتامالارىن، اليمەنتتىڭ ۋاقىتىلى تولەنگەنىن، سونداي-اق انانىڭ مەنشىگىندە ەكى پاتەردىڭ بارىن، ونىڭ بىرەۋىن جالعا الىپ، قوسىمشا كىرىس اكەلەتىنىن ەسكەردى، - دەلىنگەن حابارلامادا.

سوت ەگەر تۋعان اتا-اناسى بالانىڭ دۇرىس دامۋى مەن كۇتىمىن قامتاماسىز ەتە الاتىن بولسا، بالانىڭ وتباسىندا تاربيەلەنۋگە قۇقىعى بار ەكەنىن ەسكەردى. تالاپ قويۋ تولىعىمەن قاناعاتتاندىرىلدى. بالانىڭ اناسىنىڭ اتا-انالىق قۇقىقتارى قالپىنا كەلتىرىلدى، ودان اليمەنت ءوندىرىپ الۋ توقتاتىلدى.

قاۋلى زاڭدى كۇشىنە ەندى.

ەسكە سالساق، ەلدە «اتا-انالار اكادەمياسى» جوباسى ىسكە قوسىلادى.

اۆتور

نازىم بولەسوۆا