اسىل تۇقىمدى ءىرى قارانىڭ ۇلەسى نەلىكتەن وسپەي جاتىر - دەپۋتاتتىق ساۋال

- مەملەكەت باسشىسىنىڭ تاپسىرماسى بويىنشا ازىرلەنگەن مال شارۋاشىلىعىن دامىتۋدىڭ 2026-2030 -جىلدارعا ارنالعان كەشەندى جوسپاردا ءىرى قارا مال باسىن قازىرگى 8,2 ميلليون باستان 12 ميلليون باسقا دەيىن ارتتىرۋ ەسكەرىلگەن. جىل باسىنداعى اسىل تۇقىمدى ءىرى قارا مالدىڭ سانى 994 مىڭ باستى نەمەسە بارلىق ءىرى قارا مالدىڭ 12 پايىز ۇلەسىن قۇراعان. ۇكىمەت تاراپىنان جىل سايىن قوماقتى قاراجات بولىنسە دە، سوڭعى 5 جىلدا اسىل تۇقىمدى ءىرى قارا مالدىڭ ۇلەسى وسى 12 پايىز دەڭگەيىندە قالىپ وتىر. قولدانىستاعى مال شارۋاشىلىعىن دامىتۋعا باعىتتالعان باعدارلامالارعا شارۋالاردى مال باسىن اسىلداندىرۋعا ىنتالاندىراتىن تەتىكتەر مەن تالاپتار ەنگىزىلۋى ءتيىس. ماسەلەن، ۇلىتاۋ وبلىسىندا «جايلاۋ» باعدارلاماسىن ىسكە اسىرۋعا 3,4 ميلليارد تەڭگە بولىنگەن. بۇگىندە جالپى سوماسى 2 ميلليارد تەڭگە بولاتىن 6 جوبا ماقۇلدانعان. الايدا بۇل جوبالار ىسكە اسپاي قالۋى مۇمكىن. نەگىزگى ماسەلە - اسىل تۇقىمدى مالدىڭ باعدارلاماداعى ەسەپتىك باعاسى مەن نارىقتاعى ناقتى باعاسىنىڭ اراسىنداعى ايىرماشىلىق،-دەدى سەرىك ەگىزبايەۆ.

ونىڭ ايتۋىنشا، اسىل تۇقىمدى مال وسىرەتىن شارۋاشىلىقتار قولدا بار ارتىق مال باسىن نارىقتاعى باعادان تومەن ساتۋعا ىنتاسى جوق بولسا، بۇل ايىرماشىلىقتى فەرمەر ءوز قالتاسىنان تولەۋگە قوسىمشا قاراجات ىزدەۋگە ءماجبۇر. ناتيجەسىندە فەرمەرگە بەلگىلى ءبىر مال باسىن ساتىپ الۋعا نەسيە ماقۇلدانعانىمەن، بولىنگەن قاراجات ناقتى نارىقتاعى سول كولەمدەگى مالدى ساتىپ الۋعا جەتپەي وتىر. بۇنداي ۇقساس ماسەلە «يگىلىك» جانە «بەرەكە» باعدارلامالارىندا دا بار.

- وسىعان وراي «اۋىل» پارتياسى فراكتسياسى باعدارلامالارعا مال باعاسىن بەكىتۋدە ونىڭ قۇنىن ەسەپتەۋ مەحانيزمىن قايتا قاراۋدى ۇسىنادى. سونىمەن قاتار، مال باسىن جاپپاي اسىلداندىرۋ جۇمىستارىنا «اسىل تۇلىك» ۇيىمىنىڭ پوتەنتسيالىن تارتا وتىرىپ، ارنايى باعدارلاما ازىرلەپ، ونىڭ ىشىندە مالدى قولدان ۇرىقتاندىرۋ تەحنولوگياسىن جاڭعىرتۋ قاجەت. بۇدان بولەك، اسىل تۇقىمدى رەپرودۋكتورلاردى سالانىڭ تاعى ءبىر جەكە سۋبەكتىسى رەتىندە زاڭداستىرۋدى جانە ولاردىڭ جۇمىسىن مال باسىنىڭ گەنەتيكالىق الەۋەتىن ارتتىرۋ ماقساتىندا سەلەكتسيالىق جۇمىستى وڭتايلاندىرۋ ءۇشىن عىلىمي ينستيتۋتتارمەن ۇيلەستىرۋ قاجەت، - دەدى دەپۋتات.

ايتا كەتەيىك، بۇعان دەيىن اسىل تۇقىمدى قوي شارۋاشىلىعى جايىندا جازعان ەدىك.