اۋستراليادا ولىمگە اكەلەتىن ورمەكشىلەردىڭ جاڭا ءتۇرى تابىلدى

استانا. KAZINFORM - اۋستراليانىڭ شىعىس جاعالاۋىندا ولىمگە اكەلەتىن ۋلى ورمەكشىلەردىڭ جاڭا ءتۇرى تابىلدى.

жәндік
Фото: Есімжан Нақтыбай/Kazinform

بۇل تۋرالى سيدنەي ۇلتتىق مۇراجايى مەن نيۋكاسل ۋنيۆەرسيتەتىنىڭ مالىمدەمەسىندە ايتىلدى، دەپ حابارلايدى ت ا س س.

ورمەكشىنىڭ بۇل ءتۇرى كونتينەنتتىڭ ەڭ قاۋىپتى ومىرتقاسىزدارىنىڭ ءبىرى - سيدنەي شۇڭقىرلى ورمەكشىلەر توبىنا جاتاتىنى اتاپ ءوتىلدى. ىرىلىگىمەن جانە مىقتى ۋىمەن ەرەكشەلەنەتىن ورمەكشىنىڭ جاڭا تۇرلەرى نيۋكاسل قالاسىن جانە ونىڭ اينالاسىن مەكەندەگەن، ال ولاردىڭ كىشىلەۋ تۇرلەرى سيدنەيدە جانە مەگاپوليسكە ىرگەلەس اۋدانداردا ءجيى كەزدەسەدى.

نيۋكاسل ۋنيۆەرسيتەتىنىڭ كلينيكالىق توكسيكولوگيا كافەدراسىنىڭ مەڭگەرۋشىسى دجەفف يسبيستەردىڭ ايتۋىنشا، بۇل ورمەكشىلەر شامامەن 20 جىل بۇرىن بايقالعان.

- نەگىزى بۇل ورمەكشىلەر بۇرىننان وسىندا بولعان، ءبىراق ولاردىڭ باسقالارعا قاراعاندا ەرەكشە ەكەنىن ەندى عانا تۇسىندىك. دەگەنمەن، قولدا بار انتيدوت ونىڭ ۋىنا قارسى تۇرا الاتىنى قۋانتادى، - دەدى ول.

جاڭا ءتۇردى سيپاتتاۋ ءۇشىن عالىمدار جاقىندا الىنعان جۇزدەگەن ورمەكشىلەردىڭ د ن ق- سىن وتكەن عاسىردىڭ باسىنداعى ورمەكشىلەرمەن سالىستىرىپ كورگەن.

Atrax christenseni دەپ اتالاتىن جاڭا ءتۇردىڭ اشىلۋىنا اكەلەتىن زەرتتەۋلەر سيدنەي باۋىرىمەن جورعالاۋشىلار ساياباعىنداعى زەرتحاناعا ادەتتەگىدەن ۇلكەن جانە وتە اگرەسسيۆتى ورمەكشى اكەلگەننەن كەيىن باستالعان.

- اۋەلى، بۇل ورمەكشىلەر وسى تۇردەگى باسقا ورمەكشىلەرمەن سالىستىرعاندا كەرەمەت ۇلكەن، سونىمەن قاتار ولاردى ەرەكشەلەيتىن ءبىرقاتار سيپاتتامالارى بار ەكەنىنە نازار اۋداردىق، - دەدى زەرتحانا قىزمەتكەرى كەين كريستەنسەن.

سونداي- اق، سيدنەي شۇڭقىرلى ورمەكشىنىڭ جاڭا ءتۇرىنىڭ ەڭ ءىرى وكىلدەرىنىڭ ءبىرى 2025 -جىلدىڭ باسىندا سيدنەي باۋىرىمەن جورعالاۋشىلار ساياباعىنا الىپ كەلىنگەنى حابارلاندى. دەنە ۇزىندىعى رەكوردتىق 9,2 س م بولاتىن ورمەكشىگە اۋستراليالىق اكتەر كريس حەمسۆورتتىڭ ەسىمى بەرىلدى.

ورمەكشىلەردىڭ بۇل جاڭا ءتۇرى سيدنەيدەن 160 ك م راديۋستا جانە قالانىڭ وزىندە كەزدەسەدى. ولار جوعارى اگرەسسيۆتىلىگىمەن ەرەكشەلەنەدى. 1927- جىلدان 1981 - جىلعا دەيىن بۇل ورمەكشىلەردىڭ شاعۋىنان 13 ادام قايتىس بولعان، ءبىراق 1981 - جىلى ولاردىڭ ۋىنان جاسالعان انتيدوت الىندى، سودان بەرى بىردە- ءبىر ءولىم تىركەلمەگەن.

ەسكە سالساق، بۇدان بۇرىن اۋسترالياداعى زەرتحانادان ولىمگە اكەلەتىن ۆيرۋستاردىڭ جۇزدەگەن ۇلگىسى جوعالىپ كەتكەنى بەلگىلى بولدى.

سوڭعى جاڭالىقتار