اۋستراليادا عاسىر تاسقىنى: مىڭداعان ۇيلەر جارىقسىز قالدى، ادامدار شاتىردا وتىر
استانا. KAZINFORM - اۋستراليانىڭ شىعىس جاعالاۋىندا رەكوردتىق سۋ تاسقىنى بولدى. بۇنداي تاسقىن عاسىرعا جۋىق ۋاقىت بويى بولعان جوق. جاڭا وڭتۇستىك ۋەلس شتاتىندا زارداپ شەككەن ەلدى مەكەندەر اپات ايماعى دەپ جاريالاندى. سوڭعى مالىمەتتەر بويىنشا، ەكى ادام قازا تاۋىپ، 2 ادام ءىز-ءتۇزسىز جوعالعان، دەپ حابارلايدى Mir24.tv.
5,5 مىڭنان استام ءۇي جارىقسىز قالدى. بۇعان تولاسسىز جاۋعان جاڭبىر كىنالى. سۋ تاسقىنى سالدارىنان اعاشتار ەلەكتر سىمدارىنا قۇلادى. جوندەۋ بريگادالارى ازىرگە نىسانداردى تەكسەرىپ، جارىقتى قالپىنا كەلتىرە الماي وتىر. ولار قازىر اۋە پاترۋلىن جۇمىلدىرماق، ءبىراق ماماندار بىرنەشە كۇن ەلەكتر جارىعى بولمايتىنىن ەسكەرتىپ ۇلگەردى. قازىر سۋ باسقان ايماقتا 140 تان استام ەلدى مەكەن بار. ولاردىڭ تۇرعىندارى ۇيلەرىن تاستاپ كەتۋگە ءماجبۇر بولدى. كەيبىر ادامدار ءتىپتى شاتىرلاردان قۇتقارىلۋدا.
- بۇل - شتات حالقى ءۇشىن قورقىنىشتى اپات. ون مىڭداعان ۇيلەر قازىردىڭ وزىندە سۋ تاسقىنى ايماعىندا جانە ءبىز الداعى 24 ساعاتتا بۇدان دا جامان جاڭالىقتارعا دايىنبىز، - دەدى شتات پرەمەرى كريس ميننس.
زارداپ شەككەندەرگە كومەك كورسەتۋ ءۇشىن توتەنشە جاعدايلار قىزمەتىنىڭ 2 مىڭنان استام قىزمەتكەرى تارتىلىپ، اسكەريلەر جۇمىلدىرىلدى.
اۋستراليانىڭ شىعىس جاعالاۋىنداعى 50 مىڭنان استام تۇرعىنعا ەۆاكۋاتسيالاۋ تۋرالى ەسكەرتۋ بەرىلدى. كونتينەنتتىڭ شىعىس جاعالاۋىنىڭ گرافتوننان نيۋكاسلعا دەيىنگى 500 شاقىرىمدىق بولىگىندەگى ەلدى مەكەندەردى ەۆاكۋاتسيالاۋ تۋرالى حابارلامالار تارقاتىلدى. ەڭ قيىن جاعداي مەننينگ، گاستينگس، ماكلەي جانە نامبۋككا وزەندەرىنىڭ قۇيىلىستارىندا ورنالاسقان قالالار مەن ەلدى مەكەندەردە بايقالادى. وندا جاڭبىردان بولەك، وزەندەر ارناسىنان اسىپ جاتىر.
سوڭعى اپتادا ەلدىڭ شىعىسىنداعى ءبىرقاتار ايماقتاردا 600 م م- دەن استام جاۋىن- شاشىن ءتۇستى.
گيدرومەتەورولوگيا بيۋروسىنىڭ مالىمەتىنشە، بەيسەنبى كۇنى شىعىس جاعالاۋدىڭ ورتالىق بولىگىندە جاۋىن- شاشىننىڭ تاۋلىكتىك مولشەرى كەمىندە 300 م م بولدى. جاڭبىر جۇماعا قاراي وڭتۇستىككە قاراي جىلجىپ، سيدنەي مەن ونىڭ ماڭىنداعى قالالارعا جاۋادى.
