استانانىڭ ىرگەسىندەگى اۋىلداردا 11 دەنساۋلىق ساقتاۋ نىسانى سالىنىپ جاتىر

كوكشەتاۋ. KAZINFORM - اقمولا وبلىسىنىڭ سەلينوگراد اۋدانىندا 10-نان استام مەديتسينالىق-سانيتارلىق العاشقى كومەك نىساندارىنىڭ قۇرىلىسى باستالدى.

اقمولا وبلىسى اكىمى باسپا ءسوز قىزمەتىنىڭ مالىمەتىنشە، قۇرىلىس جۇمىستارى مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس «اۋىلدىق دەنساۋلىق ساقتاۋدى جاڭعىرتۋ» ۇلتتىق پيلوتتىق جوباسى اياسىندا قولعا الىنعان.

اتاپ ايتقاندا، نۇرەسىل، ارايلى، ورازاق، جالعىزقۇدىق اۋىلدارىندا 4 دارىگەرلىك امبۋلاتوريا، توڭكەرىس، قارامەندى باتىر، مانشۇك مامەتوۆا، اقجار، وتەمىس اۋىلدارىندا 5 فەلدشەرلىك-اكۋشەرلىك پۋنكت جانە رازدولنوە، ىنتىماق اۋىلدارىندا ەكى مەديتسينالىق پۋنكت سالىنادى.

مانشۇك مامەتوۆا، قارامەندى باتىر، رازدولنوە جانە وتەمىس اۋىلدارىندا جۇمىستار 35-45 پايىزعا ورىندالدى، ياعني عيماراتتىڭ قابىرعالارى كىرپىشپەن قالانىپ، ىشكى سىلاۋ جۇمىستارى اياقتالدى. ەندى پاراپەتتەر مەن جەلدەتكىش شاحتالاردى ورناتۋ جۇمىستارى باستالدى. سونىمەن بىرگە، عيماراتتىڭ شاتىرىن ورناتۋ جۇمىستارى دا قولعا الىنادى.

ال، نۇرەسىل، ارايلى، ىنتىماق، اقجار، ورازاق، تونكەرىس، جالعىزقۇدىق اۋىلدارىنداعى نىسانداردا قۇرىلىس جۇمىستارى 5-15 پايىزعا ورىندالدى. قۇرىلىسشىلار شۇڭقىردى تولتىرۋ جانە تىعىزداۋ، كىرپىش قالاۋعا دايىندىق جانە قورشاۋ ورناتۋ، سىرتقى جانە ىشكى قابىرعالاردى قالاۋ، قۇبىرلاردى توسەۋ، بەتون قۇيۋ جانە توسەۋ ارماتۋرامەن ىرگەتاستى نىعايتۋ، ءىبق بلوكتارىن ورناتۋ جۇمىستارىنا قىزۋ كىرىسكەن.

كەلەسى جىلى تاعى 5 دەنساۋلىق ساقتاۋ نىسانىنىڭ، ياعني جاڭاەسىل اۋىلىنداعى دارىگەرلىك امبۋلاتوريانىڭ، جاڭا جايناق، جارلىكول، راحىمجان قوشقاربايەۆ اۋىلدارىنداعى 3 فەلدشەرلىك-اكۋشەرلىك پۋنكتىنىڭ جانە شالقار اۋىلىنداعى مەديتسينالىق پۋنكتىنىڭ قۇرىلىسى باستالادى.

جالپى، بۇگىنگى كۇنى اۋداندا اۋداندىق ەمحانا، العاشقى مەديتسينالىق-سانيتارلىق كومەك ورتالىعى، 9 دارىگەرلىك امبۋلاتوريا، 25 مەديتسينالىق پۋنكت جانە 8 فەلدشەرلىك- اكۋشەرلىك پۋنكت (ف ا پ) جۇمىس ىستەيدى. اۋداننىڭ مەديتسينالىق مەكەمەلەرىندە 83 جوعارى ءبىلىمدى دارىگەر جانە 237 ورتا بۋىن مەديتسينا قىزمەتكەرى جۇمىس ىستەيدى.

بۇل رەتتە، ۇلتتىق جوبانىڭ ماقساتى - اۋىل تۇرعىندارىنا مەديتسينالىق كومەك كورسەتۋ دەڭگەيىن ارتتىرۋ. ۇلتتىق جوبانىڭ ءبىرىنشى مىندەتى اۋىلدىق ەلدى مەكەندەردى نورماتيۆتەرگە سايكەس العاشقى مەديتسينالىق- سانيتارلىق كومەك ۇيىمدارىمەن قامتاماسىز ەتۋ بولىپ تابىلادى. ۇلتتىق جوبانىڭ ءبىرىنشى مىندەتى اياسىندا مەملەكەت باسشىسىنىڭ تاپسىرماسىنا سايكەس 655 مساك نىساندارىن سالۋ جوسپارلانعان.
اۆتور
اسلان وسپانوۆ