استانانىڭ ىرگەسىندە 1200 ورىندىق ەكى مەكتەپ سالىنىپ جاتىر

كوكشەتاۋ. KAZINFORM - اقمولا وبلىسىنىڭ قوسشى قالاسى مەن سەلينوگراد اۋدانىنىڭ قابانباي باتىر اۋىلىندا 1200 ورىندىق ەكى مەكتەپ سالىنىپ جاتىر.

وڭىرلەرگە جۇمىس بابىمەن بارعان ايماق باسشىسى مارات احمەتجانوۆ جاڭا مەكتەپتەردىڭ قۇرىلىس جۇمىستارى بارىسىمەن تانىستى. قوسشى قالاسىندا 1200 وقۋشىعا ارنالعان جايلى جاڭا مەكتەپ حالىق سانى كوپ اۋداندا قولعا الىنعان. قازىرگى تاڭدا قۇرىلىس جۇمىستارى اياقتالۋعا جاقىن، مەكتەپ اۋماعى اباتتاندىرىلىپ جاتىر. سونىمەن بىرگە، وبلىس اكىمى قابانباي باتىر اۋىلىندا سالىنىپ جاتقان 1200 وقۋشىعا ارنالعان مەكتەپتىڭ قۇرىلىسىنا نازار اۋداردى.

«قازىرگى كەزدە قۇرىلىس-مونتاج جۇمىستارى، عيماراتتى سىرتىن قاپتاۋ، ىشكى ارلەۋ جۇمىستارى، ينجەنەرلىك جەلىلەر سالۋ جۇمىستارى قولعا الىنعان. جابدىق پەن باسقا دا ءبىرقاتار ماتەريالداردى جەتكىزۋ بويىنشا كەلىسىمدەر جاسالدى»، - دەدى ءادىلحان ءابىلدين.

ايماق باسشىسى بالالارعا ساپالى ءبىلىم بەرۋدە قۇرىلىس جۇمىستارىنىڭ تالاپقا ساي بولۋى ماڭىزدى ەكەنىنە توقتالدى.

«ءبىز زاماناۋي، تەحنيكالىق جابدىقتالعان وقۋ ورىندارىن سالۋىمىز كەرەك. بالالارىمىزدىڭ ءبىلىم الۋى ءۇشىن قولايلى جاعداي جاسالۋى ءتيىس. ەڭ باستىسى، قۇرىلىستىڭ ساپالى جۇرگىزىلۋىن قامتاماسىز ەتۋ جانە بارلىق نىسانداردىڭ مەرزىمىندە تاپسىرىلۋىن باقىلاۋ. ءبىلىم باسقارماسى جانە اۋدان اكىمدىك باسشىلىعى مەكتەپتەردى كاسىبي پەداگوگيكالىق كادرلارمەن قامتاماسىز ەتىپ، بالالاردىڭ دامۋىنا قوسىمشا مۇمكىندىكتەر جاساۋى قاجەت. وقۋشىلاردىڭ ساپالى ءتىزىمىن جاساپ، مەكتەپتەر اراسىندا تەڭدەي ءبولىڭىز»، - دەدى مارات احمەتجانوۆ.

وبلىس اكىمى قوعامدىق مادەني-سپورتتىق ورتالىققا سالىنىپ جاتقان كىرەبەرىس 1 ك م جولدىڭ قۇرىلىسىن دا بارىپ كوردى.

بۇگىندە مەردىگەر ۇيىم جول جامىلعىسىن جابار الدىنداعى قيىرشىق تاس توسەۋ جۇمىستارىن جۇرگىزۋدە. جالپى جوباعا اسفالت توسەۋ، جاياۋ جۇرگىنشىلەر جولى، كوشەلەرگە جارىقتاندىرۋ ورناتۋ، اۋماقتى اباتتاندىرۋ جانە تاڭبالاۋ جۇمىستارى كىرەدى.

وسى رەتتە، وبلىس باسشىسى قالا اكىمىنە نىسانداردىڭ قۇرىلىس بارىسىن باقىلاۋدى جانە قالانىڭ الەۋمەتتىك-ەكونوميكالىق دامۋى بويىنشا الداعى جۇمىستاردى جالعاستىرۋدى تاپسىردى.

ايتا كەتسەك، بۇدان بۇرىن اقمولا وبلىسىنىڭ ەسىل اۋدانىندا 21 تۇرعىن ءۇي سالىنىپ جاتقاندىعىن جازعان ەدىك.