استانانىڭ سول جاعالاۋىندا تۇرعىن ءۇي ورنىنا ساياباقتار سالىنادى
استانا قالاسى «ەسىل» اۋدانىنىڭ اكىمى اسىلبەك ەسەنبايەۆ ەسەپتىك بريفينگىندە تىعىز ۇيلەردىڭ سالىنۋى ماسەلەسىن كوتەرىپ، بىرنەشە اۋماقتىڭ دەتالدى جوسپارلاۋ جوبالارى وزگەرگەنىن ايتتى، دەپ حابارلايدى Kazinform.
«قازىر ءبىز وسى جۇيەلى ماسەلەنى شەشۋدە بەلگىلى ءبىر جەتىستىكتەرگە قول جەتكىزدىك. تۇرعىندارمەن جانە ساۋلەت باسقارماسىمەن بىرلەسىپ، بىرنەشە مەكەنجاي بويىنشا دەتالدى جوسپارلاۋ جوبالارى وزگەرتىلدى. ورىنبور، اقمەشىت، الماتى جانە تۇركىستان كوشەلەرىنىڭ كۆادراتىندا كوپ پاتەرلى تۇرعىن ءۇي كەشەنىنىڭ ورنىنا «لينەينىي» پاركىنىڭ جالعاسى رەتىندە سكۆەر قۇرىلىسى جالعاساتىن بولدى. دەمەك «ابۋ-دابي پلازا» ساۋدا ورتالىعىنان بوتانيكالىق باققا دەيىن سكۆەر جالعاسادى. بۇل تۇرعىنداردى تولعاندىرعان سۇراق بولاتىن»، - دەدى ا. ەسەنبايەۆ استانا كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سونىمەن بىرگە، قابانباي باتىر داڭعىلىنداعى «پوكولەنيە» تۇرعىن ءۇي كەشەنىنىڭ جەر ۋچاسكەسىنىڭ ءبىر بولىگى مەكتەپ قۇرىلىسىنا بەرىلدى.
«كاسپيان پالاس» تۇرعىن ءۇي كەشەنى ماڭىنداعى ماڭگىلىك ەل داڭعىلى بويىنداعى جەر ۋچاسكەسىنىڭ دەتالدى جوسپارلاۋ جوباسىن وزگەرتىپ، كەشەن قۇرىلىسىنىڭ ورنىنا ساياباق سالۋعا ءوتىنىم بەرىلدى. قازىرگى ۋاقىتتا سوت پروتسەستەرى ءجۇرىپ جاتىر»، - دەدى اۋدان اكىمى.
ودان بولەك، «نوۆا سيتي» ت ك اۋدانىنداعى ۋچاسكەدەگى جوسپار پاركينگ پەن كولىك جۋۋ ورنىنان مەملەكەتتىك بالاباقشا قۇرىلىسىنا تۇزەتىلگەن.
«ەسىل اۋدانى - ەلوردانىڭ ەڭ قارقىندى دامىپ كەلە جاتقان اكىمشىلىك ورتالىعى، بۇكىل قالا تۇرعىندارى مەن تۋريستەردى قىزىقتىراتىن ورىن. ءبىز ولاردىڭ جايلىلىعى ءۇشىن كوپ كۇش جۇمسايمىز. بىزگە تۇرعىنداردىڭ باستامالارى مەن ۇسىنىستارى كومەكتەسەدى»، - دەدى ا. ەسەنبايەۆ.
