استانانى سۋ باسۋى مۇمكىن بە؟
استانا. KAZINFORM - استانادا سۋ تاسقىنىنا قاتىستى جاعداي تۇراقتى. پرەمەر-مينيستر ولجاس بەكتەنوۆ استانا قالاسىنىڭ اكىمى جەڭىس قاسىمبەك، اقمولا وبلىسىنىڭ اكىمى مارات احمەتجانوۆپەن بىرگە سۋ تاسقىنى جاعدايىن تەكسەردى.
استانا قالاسى ارقىلى تاسقىن سۋلاردى وتكىزۋگە جانە سۋ تاسقىنىنان قورعاۋعا ارنالعان استانا كونتررەتتەگىشىنىڭ جاي-كۇيى تەكسەرىلگەن. سونىمەن قاتار، جاۋاپتى تۇلعالار مايبالىق كولى مەن ۆياچەسلاۆ سۋ قويماسىنىڭ جاعدايىن باقىلادى.
استانالىق كونتررەتتەگىشتە سەكۋندىنا 30 تەكشە مەتر سۋ اعادى. كونتررەتتەگىشكە كەلىپ جاتقان اعىن سەكۋندىنا 248 تەكشە مەتر بولادى.
«بۇگىنگى تاڭدا كونتررەتتەگىشتىڭ سۋ اعىزۋ قابىلەتىن سەكۋندىنا 40 تەكشە مەترگە دەيىن ارتتىرۋ جوسپارلانىپ وتىر. سۋ رەسۋرستارى جانە يرريگاتسيا مينيسترلىگىنىڭ مالىمەتتەرى بويىنشا احۋال تۇراقتى جانە ۇدايى باقىلاۋدا، استانا قالاسىن سۋ باسۋ قاۋپى جوق»، - دەپ جازىلعان ۇكىمەت حابارلاماسىندا.
استانا قالاسى مەن اقمولا وبلىسىنىڭ اكىمدىگى جاقىن ماڭداعى ەلدى مەكەندەر مەن قالالاردى سۋ باسۋدىڭ الدىن الۋ بويىنشا بىرلەسكەن جۇمىستار جۇرگىزىپ جاتىر.
بيىل قولدانىستاعى 2400 مەترلىك بوگەتكە ۇزىندىعى 1200 مەتر، بيىكتىگى 2,5 مەتر بولاتىن جاڭا بوگەت تۇرعىزىلدى.
