استانانىڭ جاڭا باس جوسپارى قانداي

  اشىق نورماتيۆتىك- قۇقىقتىق اكتىلەر پورتالىنا استانا قالاسىنىڭ 2035-جىلعا دەيىنگى باس جوسپارى تالقىلاۋعا شىعارىلدى.

جوسپار كەلەشەكتەگى كەشەندى دامۋدى، اۋماقتى جوسپارلى ۇيىمداستىرۋدى، الەۋمەتتىك جانە ينجەنەرلىك- كولىك ينفراقۇرىلىم جۇيەسى باعىتتارىن ايقىندايتىن نەگىزگى قالا قۇرىلىسى قۇجاتى سانالادى، دەپ حابارلايدى Kazinform.

باس جوسپاردا كەلەسى جوبالىق كەزەڭدەر قابىلدانعان: باستاپقى جىل - 2021 -جىلعى 1-قاڭتار؛ قۇرىلىستىڭ ءبىرىنشى كەزەگى - 2025-جىل؛ ەسەپتىك مەرزىم - 2035-جىل.

قالا اۋماعىنىڭ اكىمشىلىك شەكارالارى شەگىندەگى حالىق سانى 2021-جىلى 1 ميلليون 184,4 مىڭ ادامدى قۇرادى. ال بولجامعا سايكەس، 2025-جىلى حالىق سانى 1 ميلليون 480 مىڭ ادامعا، 2035 -جىلى 2 ميلليون 275 مىڭ ادامعا جەتەدى. بۇل رەتتە حالىق سانى الداعى 4 جىلدا 295,6 مىڭ ادامعا، ال ودان كەيىنگى 10 جىلدا 795 مىڭ ادامعا ارتادى. ەڭبەككە قابىلەتتى جاستاعى حالىق ەسەپتىك مەرزىمىنىڭ سوڭىنا قاراي قالا حالقىنىڭ سانى 66 پايىزدى قۇرايدى.

باس جوسپارداعى نەگىزگى ماقساتتاردىڭ ءبىرى - تۇرعىن ءۇي قورىمەن قامتاماسىز ەتۋ كورسەتكىشى بويىنشا ديسپروپورتسيانى جويۋ. 2021 -جىلى قالانىڭ بارلىق تۇرعىندارىنىڭ باسپانامەن ورتاشا قامتاماسىز ەتىلۋى ءبىر تۇرعىنعا شاققاندا 21,1 شارشى مەتر بولعاندا 24 996,2 مىڭ شارشى شاقىرىمدى قۇرادى. ەسەپتى كەزەڭگە ارنالعان باس جوسپاردا قالادا تۇرۋدىڭ جايلىلىعىن قامتاماسىز ەتۋ ءۇشىن تۇرعىن ءۇي قورىمەن ءبىر ادامدى 30 شارشى مەترمەن قامتاماسىز ەتۋ كورسەتكىشى قابىلداندى جانە تۇرۋدىڭ وسىنداي جايلىلىق دەڭگەيىنە قول جەتكىزۋ ءۇشىن تۇرعىن ءۇي قورىن 68250 مىڭ شارشى مەترگە دەيىن ۇلعايتۋ قاجەت.

ءبىرىنشى كەزەڭگە (2025 -جىلى) ءبىر ادامعا تۇرعىن ءۇي قورىمەن قامتاماسىز ەتۋدى 26 شارشى مەترگە دەيىن ۇلعايتۋ جوسپارلانعان. بۇل رەتتە تۇرعىن ءۇي قورى 37200 مىڭ شارشى مەترگە جەتەدى.

باس جوسپاردا قالا ەكونوميكاسىنىڭ مىناداي باسىم باعىتتارى ايقىندالعان:

- قالانى قازاقستان رەسپۋبليكاسىنىڭ استاناسى، «سىرتتا» قالانىڭ اشىلۋىنا بايلانىستى جاھاندىق ورتالىق رەتىندە كورسەتۋ؛

- قالانىڭ «ىشكە» اشىلۋىنا بايلانىستى قالا تۇرعىندارى، ونىڭ ىشىندە الەۋەتتى ميگرانتتار ءۇشىن تارتىمدى، جايلى ينكليۋزيۆتى « ءومىر سۇرۋگە ارنالعان قالاعا» اينالۋى؛

- ەكونوميكا جانە جۇمىسپەن قامتۋ قۇرىلىمىن ءارتاراپتاندىرۋ.

استانا قالاسى بۇگىنگى كۇنى IT - سەكتوردى دامىتۋ ءۇشىن ايتارلىقتاي الەۋەت جيناقتاپ ۇلگەردى جانە ورتالىق ازيانىڭ ءىت- استاناسى رولىنە ۇمىتكەر قالالاردىڭ ءبىرى رەتىندە ورنالاسۋى ابدەن مۇمكىن.

بۇل بىرنەشە فاكتورلارعا بايلانىستى:

قالادا قازاقستاندىق IT- چەمپيوندار جۇمىس ىستەيتىن كومپانيالاردىڭ جارتىسى ورنالاسقان؛

قالادا IT- ۋنيۆەرسيتەت اشىلدى؛

استانادا ورتالىق ازياداعى IT- ستارتاپتاردىڭ ءىرى حالىقارالىق تەحنوپاركى - استانا حاب جۇمىس ىستەيدى.

قالانى جوبالاۋدىڭ ماڭىزدى فاكتورى تۇرعىندار مەن تۋريستەر ءۇشىن ىڭعايلى قالالىق ورتانى، قالا تۇرعىندارىنا ىڭعايلى كولىك جۇيەسىن قۇرۋ بولدى. ول ءۇشىن كولىك پەن جاياۋ جۇرگىنشىلەردى ءبولۋ، جاياۋ جۇرگىنشىلەر ايماقتارى مەن ۆەلوسيپەد جولدارىن قۇرۋ، دەمالىس جانە مادەني ءىس- شارالار كەڭىستىگىن قۇرۋ سياقتى زاماناۋي قالا قۇرىلىسى تۇجىرىمدامالارى قولدانىلدى.

باس جوسپاردا اكىمشىلىك اۋداندار شەكاراسىندا 5 جوسپارلاۋ اۋدانى، سونداي- اق 148 جوسپارلاۋ سەكتورى كوزدەلگەن. جوسپارلاۋ اۋداندارىنىڭ ءارقايسىسىندا قوعامدىق ورتالىقتار قۇرۋ قاراستىرىلعان. ولاردا ورنالاسقان اۋدان ورتالىقتارى بار اۋداندارعا بولىنەتىن قالادا اۋدان ورتالىقتارىن ىسكەرلىك ورتالىقپەن، ونەركاسىپتىك كاسىپورىندارمەن، ساياباقتارمەن، ستاديوندارمەن، ۆوكزالدارمەن بايلانىستىراتىن قوسىمشا ماگيسترالدىق كوشەلەر پايدا بولادى.

كەشەندى قوعامدىق ورتالىقتاردىڭ جوسپارلاۋ قۇرامى قالا قۇرىلىسى پروفيلىمەن جانە قالانىڭ كولەمىمەن، جەرگىلىكتى تابيعي جاعدايلارمەن جانە قالىپتاسقان جوسپارلاۋ جاعدايىمەن انىقتالادى. جوسپارلاۋ ورتالىقتارىن دامىتۋ قالا تۇرعىندارىن باستاپقى قىزمەت كورسەتۋ وبەكتىلەرىمەن قامتاماسىز ەتۋمەن، كولىك تەرمينالدارىن، ساياباق ايماقتارى، ساۋدا ورتالىقتارى مەن سپورت وبەكتىلەرى بار قوعامدىق كەڭىستىكتەردى دامىتۋمەن جانە ۇيلەسىمدى، جايلى ورتا قۇرۋمەن تەڭەستىرىلەتىن بولادى.

حالىقتى قىزمەت كورسەتۋ جانە تىرشىلىك ەتۋ وبەكتىلەرىمەن قامتاماسىز ەتۋ ءۇشىن قالا ءارقايسىسىندا 10 مىڭعا جۋىق حالقى بار 148 جوسپارلاۋ سەكتورىنا بولىنەتىن بولادى. 2035 -جىلعا دەيىن قالادا تاعى 2 سۋ سورۋ ستانساسى، كارىزدىك- تازارتۋ قۇرىلىسى سالىنادى. قۇجات جوباسى بويىنشا كوپشىلىك تالقىلاۋ مەرزىمى - 2023 -جىلدىڭ 8-جەلتوقسانى.

اۆتور

مارلان جيەمباي