استانانىڭ باس سانيتار دارىگەرى بەتپەردە تاعۋدى ۇسىندى

استانا. KAZINFORM - باس قالادا قىزىلشاعا قاتىستى جاعداي ءالى دە تۇراقتى ەمەس. استاناداعى قىزىلشا اۋرۋى تۋرالى قالانىڭ باس مەملەكەتتىك سانيتارلىق دارىگەرى سارحات بەيسەنوۆا ايتىپ بەردى.

باس قالادا قىزىلشاعا قاتىستى جاعداي ءالى دە تۇراقتى ەمەس. جىل باسىنان بەرى قالادا قىزىلشانىڭ 2278 باستاپقى جانە 609 راستالعان جاعدايى تىركەلدى، ونىڭ ىشىندە 14 جاسقا دەيىنگى بالالار اراسىندا - 429.

«وتكەن باياندامامدا اتاپ وتكەنىمدەي، اۋرۋ ەرەسەكتەر اراسىندا كوبەيە باستادى، وندا قارقىندى كورسەتكىش 25,2 پايىزدان 40,2 پايىزعا ءوستى. بۇل رەتتە، جۇرگىزىلىپ جاتقان قوسىمشا جاپپاي يممۋنداۋ جەلتوقسان ايىمەن سالىستىرعاندا 1 جاسقا دەيىنگى، 1 جاستاعى جانە 2 جاسقا دەيىنگى بالالار اراسىندا سىرقاتتانۋشىلىقتىڭ تومەندەۋىنە اسەر ەتتى. ماسەلەن، 1 جاسقا دەيىنگى بالالاردىڭ اۋرۋشاڭدىعى 15 پايىزعا، 1 جاستاعىلار 8,5 پايىزعا جانە 2 جاستاعى بالالار تيىسىنشە 21,3 پايىزعا تومەندەدى»، - دەدى سارحات بەيسەنوۆا.

ۇلتتىق ساراپتاما ورتالىعىنىڭ ەلوردالىق فيليالىندا جۇرگىزىلگەن زەرتتەۋلەر قىزىلشا

ۇلگىلەرىنىڭ %100 D8 گەنوتيپىنە جاتاتىنىن كورسەتتى، بۇل شتام 1980 -جىلدارى ازيادا پايدا بولدى جانە قازىر بۇكىل الەمگە تارالۋدا. D8 گەنوتيپى ەۋروپادا، ازيادا جانە سولتۇستىك امەريكادا سوڭعى 4 جىلدا شىققان گەنوتيپتەردىڭ ءبىرى بولىپ سانالادى.

«اۋا ارقىلى بەرىلەتىن جۇقپالى اۋرۋلاردىڭ ءوسۋىن نازارعا الا وتىرىپ، جۇقپالى اۋرۋلاردىڭ تارالۋىنىڭ الدىن الۋ جونىندەگى پروفيلاكتيكالىق شارالاردى كۇشەيتۋ تۋرالى» قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرىنىڭ 2024 -جىلعى 8-اقپانداعى №2-قاۋلىسى شىعارىلدى، وعان سايكەس حالىق كوپ جينالاتىن جەرلەردە مەديتسينالىق نەمەسە ماتا ماسكالارىن پايدالانۋ ۇسىنىلادى. اتاپ ايتقاندا، ءبىز اۋەجايلار، تەمىرجول ۆوكزالدارى، بازارلار، ساۋدا-ويىن-ساۋىق ورتالىقتارى، ساۋدا ۇيلەرى، تەاترلار، كينوتەاترلار، ح ق و، بانكتەر تۋرالى ايتىپ وتىرمىز»، - دەپ تولىقتىردى باس سانيتارلىق دارىگەر.

بۇدان وزگە اقپان ايىندا كوروناۆيرۋس جۇقتىرعان 25 ادام انىقتالدى. قازىر ستاتسيوناردا ءۇش پاتسيەنت بار، قالعاندارى امبۋلاتوريالىق ەمدەلۋدە.

سونداي-اق، ماسكانى كولىكتىڭ بارلىق تۇرىندە تاعۋ ۇسىنىلادى: قوعامدىق، اۋە جانە تەمىرجول. سونىمەن قاتار، قالا تۇرعىندارى بۇقارالىق ءىس-شارالارعا، اسىرەسە بالالارمەن قاتىسپاعانى ءجون.