استانانى اينالا قويىلعان پوليتسيا بەكەتتەرى قاشان جۇمىسىن توقتاتادى
استانا. KAZINFORM – ق ر ىشكى ىستەر مينيسترلىگى ەلورداعا كىرە بەرىستە قويىلعان پوليتسيا بەكەتتەرى جۇمىسىن قاشان اياقتايتىنىن ناقتىلادى.
«استانادا شاڭحاي ىنتىماقتاستىق ۇيىمىنىڭ سامميتىن وتكىزۋ كەزەڭىندە قوعامدىق ءتارتىپ پەن قاۋىپسىزدىكتى قامتاماسىز ەتۋ، سونداي-اق قۇقىق بۇزۋدىڭ الدىن الۋ جانە جولىن كەسۋ ماقساتىندا پوليتسيانىڭ جەكە قۇرامى قىزمەت وتكەرۋدىڭ كۇشەيتىلگەن تارتىبىنە اۋىستىرىلعان. قالاعا كىرەبەرىستە «رۋبەج» پوليتسياسىنىڭ ستاتسيونارلىق بەكەتتەرى جۇمىس ىستەدى، وندا قۇجاتتار تەكسەرىلىپ، اۆتوكولىكتەردە تىيىم سالىنعان زاتتاردىڭ بار-جوعى تەكسەرىلدى»، - دەلىنگەن ق ر ىشكى ىستەر مينيسترلىگى باسپا ءسوز قىزمەتىنىڭ Kazinform اگەنتتىگىنە بەرگەن جاۋابىندا.
بۇل بەكەتتەر جۇمىسىن قىركۇيەك ايىنىڭ ورتاسىنا دەيىن جالعاساتىراتىنى بەلگىلى بولدى.
«قازىرگى كەزدە بەكەتتەر V دۇنيەجۇزىلىك كوشپەندىلەر ويىندارىنا دايىندىق كەزەڭىندە جانە ولار اياقتالعانعا دەيىن جۇمىس ىستەيدى. سونىمەن قاتار، ازاماتتاردىڭ قالاعا كىرۋى مەن شىعۋى بويىنشا قانداي دا ءبىر شەكتەۋلەر قاراستىرىلماعان»، - دەپ اتالىپ وتكەن ۆەدومستۆو اقپاراتىندا.
ەسكە سالساق، ش ى ۇ سامميتى 3-4-شىلدەدە ءوتتى. وسىعان وراي، تەرروريستىك قاۋىپتىڭ «سارى» دەڭگەيى ەنگىزىلىپ، الەمگە بەلگىلى تاجىريبەگە سايكەس ۋاكىلەتتى مەملەكەتتىك ورگاندار ەلگە كەلەتىن شەتەلدىك دەلەگاتسيالاردىڭ، ولاردىڭ ىشىندە مەملەكەت باسشىلارى مەن حالىقارالىق ۇيىمدار باسشىلارىنىڭ قاۋىپسىزدىگىن جوعارى دەڭگەيدە قامتاماسىز ەتۋگە تولىققاندى شارالار قابىلدادى.
ال V دۇنيەجۇزىلىك كوشپەندىلەر ويىندارى استانادا 8-13-قىركۇيەك كۇندەرى وتەدى. جارىسقا الەمنىڭ 89 ەلىنەن 2 مىڭنان استام سپورتشى قاتىسادى. استانا سامميتىنە شاڭحاي ىنتىماقتاستىق ۇيىمىنا مۇشە ەلدەردەن كەلگەن مەيماندار مەن ب ا ق وكىلدەرىنە ەلوردادا وتكەلى وتىرعان V دۇنيەجۇزىلىك كوشپەندىلەر ويىندارى تانىستىرىلعان بولاتىن.
