استانالىقتار مومىش ۇلىنىڭ سوعىستا قولدانعان زاتتارىن تاماشالاي الادى
استانا. KAZINFORM - ەلورداداعى ۇلتتىق مۋزەيدە «باتىرلار - ۇرپاق ەسىندە» اتتى كورمە اشىلدى.
وندا باۋىرجان مومىش ۇلىنىڭ سوعىس كەزىندە سىزعان اسكەري ستراتەگيالىق كارتاسى، مالىك عابدۋلليننىڭ «التىن جۇلدىز» مەدالى، ءاليا مولداعۇلوۆانىڭ جوعارعى كەڭەس پرەزيديۋمىنىڭ گراموتاسى، كەڭەس وداعىنىڭ باتىرلارىنىڭ اسكەري كيىمدەرى، جەكە زاتتارى قويىلعان. كورمەدەن ەكىنشى دۇنيەجۇزىلىك سوعىستاعى قارۋلاردىڭ سيمۆولىنا اينالعان ماكسيم ماركالى پۋلەمەتتى دە كورۋگە بولادى. سونداي-اق سول كەزدەگى اسكەري ۆينتوۆكا، كەڭەس اسكەرىنىڭ سۋ ىشەتىن قۇتىسى، قاسىعى سەكىلدى قۇندى جادىگەرلەر دە بار.
قازاقتىڭ اتى اڭىزعا اينالعان مەرگەن قىزى ءاليا مولداعۇلوۆانىڭ ءسىڭلىسى ساپۋراعا جازعان حاتتارى دا كورەرمەن نازارىنا ۇسىنىلعان.
ودان بولەك، كورمەدە «اتامنىڭ اماناتى» قوعامدىق بىرلەستىگىنىڭ ماتەريالدارى ۇسىنىلدى. بۇل - ەلىمىزدەگى ەكىنشى دۇنيەجۇزىلىك سوعىستان ورالماعان، ءىز-ءتۇزسىز كەتكەندەر قاتارىنا جاتقىزىلعان قازاقستاندىق جاۋىنگەرلەردى ىزدەۋمەن اينالىساتىن جالعىز قوعامدىق ۇيىم.
- «اتامنىڭ اماناتى» بىرلەستىگى 2019-جىلى قۇرىلعان. سودان بەرى حالىقتان 10 مىڭنان استام ءوتىنىش قابىلداپ، 4 مىڭ ادامعا اتالارىنىڭ جەرلەنگەن جەرىن تاۋىپ بەردىك. سوعىسقا قاتىسقان بارلىق ەلمەن، ياعني سونداعى قوعامدىق بىرلەستىكتەر، ۇكىمەت جانە ەلشىلىكتەرمەن مەموراندۋم جاساسقانبىز. ولار بىزگە قازاقستاندىق جاۋىنگەرلەردىڭ ءتىزىمىن بەرىپ تۇرادى. قازىر قولدا 28 مىڭنان استام جاۋىنگەردىڭ ءتىزىمى بار. ياعني، قازاقستاننان سوعىسقا اتتانعان سونشا ادامنىڭ جەرلەنگەن جەرى بەلگىلى. ەندى سول جاۋىنگەرلەردىڭ ۇرپاقتارىن ىزدەۋمەن اينالىسىپ جاتىرمىز، - دەيدى اتالعان قوعامدىق بىرلەستىكتىڭ ەرىكتىلەر جۇيەسىنىڭ ۇيلەستىرۋشىسى مارفۋزا سۇلەيمەنوۆا.
كورمە داڭقتى باتىرلار باۋىرجان مومىش ۇلىنىڭ 115، مالىك عابدۋلليننىڭ 110، ءاليا مولداعۇلوۆانىڭ 100 جىلدىعىنا وراي ۇيىمداستىرىلىپ وتىر. ونىڭ ەرەكشەلىگى - ءۇش بىردەي مۋزەيدىڭ قورىنداعى بۇيىمدار قويىلعانىندا. اتاپ ايتقاندا، جامبىل تاريحي-ولكەتانۋ مۋزەيى، ءاليا مولداعۇلوۆانىڭ مەموريالدىق مۋزەيى جانە مالىك عابدۋللين مۋزەيىنەن جادىگەرلەر جەتكىزىلگەن.
ايتا كەتەيىك، بۇگىن الماتىدا دا جەڭىستىڭ 80 جىلدىعىنا ارنالعان كورمە اشىلدى.
