استانالىق وقۋشىلار ەستە ساقتاۋ قابىلەتى بار اقىلدى روزەتكا جاساپ شىعاردى
استانا. KAZINFORM - ساكەن سەيفۋللين اتىنداعى № 80 مەكتەپ- گيمنازياسىنىڭ تالانتتى وقۋشىلارى اقبوتا مەليس پەن ومار دجۋسۋپبەك ەرەكشە جوبا جاساپ شىعاردى، دەپ حابارلايدى ەلوردا اكىمدىگىنىڭ رەسمي سايتى.
SMART SOCKET دەپ اتالاتىن بۇل قۇرىلعى قازاقستاندا العاش رەت جاسالدى. ونى تەلەگرامم بوت ارقىلى كەز كەلگەن قاشىقتىقتان باسقارۋعا بولادى. ەڭ باستىسى، بۇل روزەتكانىڭ ەستە ساقتاۋ قابىلەتى بار جانە ول Bluetooth پەن Wi-Fi ارقىلى تولىققاندى جۇمىس ىستەيدى.
SMART SOCKET ەرەكشەلىكتەرى:
- ەستە ساقتاۋ قابىلەتى: قۇرىلعى قوسىلىپ تۇرعان قۇرىلعىلاردى جانە سوڭعى پارامەترلەرىن ەسىندە ساقتايدى، بۇل ونى قولدانۋدى قاۋىپسىز ءارى ىڭعايلى ەتەدى.
- قوسىمشا مۇمكىندىكتەر: تەلەگرامم بوت ارقىلى كەز كەلگەن قاشىقتىقتان باسقارۋ.
- جەلىلىك قوسىلۋ: Bluetooth ارقىلى جاقىن قاشىقتىقتا جۇمىس ىستەسە، Wi-Fi ارقىلى قوسىلۋعا بولادى.
- ەنەرگيا تيىمدىلىگى: قۋات تۇتىنۋدى ناقتى ۋاقىتتا باقىلاپ، قاجەتتىلىكتەرگە قاراي باپتاۋعا مۇمكىندىك بەرەدى.
- قاۋىپسىزدىك: توتەنشە جاعدايلاردى انىقتاپ، قاۋىپتەردى الدىن الا ەسكەرتۋ.
- 3D تەحنولوگيالار: قۇرىلعىنىڭ پروتوتيپى 3D پرينتەردەن جاسالىپ، بارلىق سىناقتان ءساتتى ءوتتى.
- SMART SOCKET بۇل تەحنولوگيانى ادامنىڭ يگىلىگى ءۇشىن قولدانۋدىڭ ايقىن ۇلگىسى. ءبىز جوبانى ازىرلەۋ كەزىندە ۇلكەن تاجىريبە جينادىق، ءارى ادامداردىڭ ءومىرىن جەڭىلدەتۋدى ماقسات تۇتتىق»، - دەيدى جوبا اۆتورلارى اقبوتا مەن ومار.
جوبا جەتەكشىسى، ينفورماتيكا ءپانىنىڭ مۇعالىمى جانارگۇل بايكەنجەيەۆا SMART SOCKET جاس بۋىننىڭ شىعارماشىلىق الەۋەتىنىڭ ناتيجەسى ەكەنىن ايتتى. ول سونداي-اق بولاشاقتا اتالعان جوبانى ءار ۇيگە قولجەتىمدى ەتىپ، ونىڭ مۇمكىندىكتەرىن ودان ءارى ارتتىرۋدى جوسپارلاپ وتىرعانىن جەتكىزدى.
