استانالىق جەدەل جاردەم فەلدشەرى: كەيدە جالعان شاقىرتۋلار بولادى

Астана
Фото: Kazinform/ Виктор Федюнин

 استانا. KAZINFORM - تالشىن يۋسۋپ تۇركىستان قالاسىنىڭ تۋماسى. تۋعان جەرىندەگى مەديتسينالىق كوللەدجدى بىتىرگەن سوڭ، ەڭبەك جولىن استانادان باستاعان.

قازىر سارىارقا اۋداندىق جەدەل جاردەم قىزمەتىندە فەلدشەر بولىپ جۇمىس ىستەيدى.

«دارىگەر ماماندىعىن بالا كەزىمنەن ۇناتامىن. اجەم ءجيى اۋىراتىن، جادەل جاردەم كومەك كورسەتىپ، اجەمنىڭ العىسىن العاندا مەندە دارىگەر بولسام دەپ ارماندايتىنمىن. سالىستىرمالى تۇردە تۇندە شاقىرۋ كوپ تۇسەدى. سەبەبى ناۋقاستاردىڭ كوپ جاعدايدا دەنە قىزۋى، قۇرىسۋى تۇنگى ۋاقىتتا باستالادى. كۇندىزگى كەزەكشىلىكپەن سالىستىرعاندا تۇندە شاقىرتۋعا ەكى ەسە ءجيى شىعامىز. سەنبى، جەكسەنبى كۇندەرى جەدەل جاردەمدى شاقىرتۋ كوبەيەدى، ويتكەنى دەمالىس كۇندەرى ەمحانالار جۇمىس ىستەمەيدى»، - دەدى تالشىن يۋسۋپ.

Астана
Фото: Виктор Федюнин

جەدەل جاردەم قىزمەتكەرلەرى 2 كۇن (1 كۇن كۇندىز، 1 كۇن تۇندە) جۇمىس ىستەپ، 2 كۇن دەمالادى.

«جاردەمنىڭ شۇعىل جەتۋىنە تاعى ءبىر كەدەرگى - كەپتەلىس. بارلىق كوشەدە كەپتەلىس دەپ ايتا المايمىن، دەگەنمەن ۇلكەن داڭعىلداردا كولىك كەپتەلىسى بار. 1- جانە 2- ساناتتاعى جەدەل شاقىرتۋعا بارعاندا دابىل جۇيەسى قوسىلادى. جەدەل جاردەم 4 ساناتقا بولىنەدى. ءبىرىنشى، جەدەل جاردەمگە اسا مۇقتاج جاعداي، ول كەزدە 10 مينۋتقا دەيىن جەتۋىمىز كەرەك. 2- ساناتتاعى شاقىرتۋعا 15 مينۋتقا دەيىن جەتۋى ءتيىس. ءۇشىنشى دەڭگەيگە 30 مينۋتتا، ال ءتورتىنشى دەڭگەيدەگى جەدەل كومەككە 1 ساعات شاماسىندا بارۋعا مىندەتتىمىز»، - دەيدى ول.

жедел жәрдем
Фото: Kazinform/Виктор Федюнин

ونىڭ ايتۋىنشا، كەيدە جالعان شاقىرتۋلار دا بولادى. ياعني جەدەل جاردەمدى شاقىرتادى، دارىگەرلەر جەتكەندە مەديتسينالىق كومەكتەن باس تارتادى.

«ءار ادام ءارتۇرلى، سول سياقتى ناۋقاستاردىڭ جاعدايى دا، ءوزىن ۇستاۋى دا ءارتۇرلى. باستى تالاپتىڭ ءبىرى - ناۋقاسپەن جانجالداسپاۋ. ەگەر پاتسيەنت شەكتەن شىقسا، ءىستىڭ ءمان-جايىن اعا دارىگەرگە جەتكىزەمىز. ءبىزدىڭ جۇمىستا ەڭ باستىسى ماماندىعىن ۇناتۋ، قىزىعۋشىلىق بولماسا جۇمىس ونبەيدى، ەكىنشى ماڭىزدى ءسات ول جىلدامدىق، شۇعىل ءارى ناقتى شەشىم قابىلداي ءبىلۋ»، - دەدى فەلدشەر.

Жедел жәрдем
Фото: Kazinform/Виктор Федюнин

اۆتور

داۋلەت ىزتىلەۋ

سوڭعى جاڭالىقتار