استانالىق ايەل جالعان قۇجات جاساپ، كولونياعا كەزدەسۋگە كىرمەك بولعان

استانا. KAZINFORM - استانا تۇرعىنى قاۋىپسىزدىگى بارىنشا جوعارى كولونياعا سوتتالعان ازاماتعا ۇزاق كەزدەسۋگە كەلىپ، نەكەگە تۇرۋ تۋرالى جالعان كۋالىگىن ۇسىنعان. 

قۇجاتتىڭ ءتۇپنۇسقالىعى مەكەمە قىزمەتكەرلەرىندە كۇمان تۋدىردى، اقمولا وبلىسى ارشالى كەنتىنىڭ ا ح ا ت قىزمەتكەرلەرى كۇماندى راستاپ، تىركەۋ جۋرنالىندا نەكە قيۋ تۋرالى كۋالىك كورسەتىلمەگەنىن حابارلادى.

قازىرگى ۋاقىتتا اقمولا وبلىسى پ د ارشالى اۋداندىق پوليتسياسى ق ر ق ك 385-بابى 3-بولىگى بويىنشا «جالعان قۇجاتتاردى، مورلەردى، بلانكىلەردى، پوشتا تولەمىنىڭ مەملەكەتتىك بەلگىلەرىن، مەملەكەتتىك ناگرادالاردى قولدان جاساۋ، دايىنداۋ نەمەسە وتكىزۋ» بويىنشا سوتقا دەيىنگى تەرگەپ-تەكسەرۋدى باستادى. ايەلگە 160 ا ە ك-كە دەيىن ايىپپۇل سالىنادى نە سول مولشەردە تۇزەۋ جۇمىستارى، نە 160 ساعاتقا دەيىنگى قوعامدىق جۇمىستار نەمەسە 40 تاۋلىككە دەيىن قاماۋعا الىنادى.

«قىلمىستىق اتقارۋ جۇيەسى قىزمەتىن رەتتەيتىن „نورماتيۆتىك- قۇقىقتىق اكتىلەردىڭ تالاپتارىنا سايكەس ۇزاق كەزدەسۋلەر جۇبايىمەن (زايىبىمەن، جاقىن تۋىستارىمەن) بەرىلەدى، وندا تۋىستىق بايلانىستار ءتيىستى قۇجاتتارمەن راستالادى»، - دەپ اتاپ ءوتتى استانا قاجد باستىعىنىڭ ورىنباسارى يرسالي احمەدوۆ.