استاناداعى تۋعا قاتىستى وقيعا: پوليتسيا قىلمىستىق ءىس قوزعادى

استانا. KAZINFORM - ىشكى ىستەر مينيسترلىگى استاناداعى LED- ەكراندا رەسەي مەملەكەتتىك تۋى ۋكراينا تۋىنا اۋىستىرىلۋىنا قاتىستى وقيعانى تەكسەرۋدى باستادى.

ۆەدومستۆو مالىمەتىنشە، بولعان وقيعانىڭ بارلىق ىقتيمال نۇسقالارىن، سونىڭ ىشىندە تەحنيكالىق اقاۋلارى بار نۇسقالاردى، سونداي-اق Keruen Media كومپانياسىنىڭ جابدىقتارىنىڭ جۇمىسىنا سىرتتان زاڭسىز ارالاسۋ مۇمكىندىگى دە قاراستىرىلىپ جاتىر.

«وقيعانىڭ بارلىق ءمان-جايى انىقتالىپ جاتىر. زاڭسىز ارەكەتكە بارعاندار جاۋاپقا تارتىلادى»، - دەلىنگەن حابارلامادا.

بۇل وقيعاعا ۇلتتىق قاۋىپسىزدىك كوميتەتىنىڭ مەملەكەتتىك تەحنيكالىق قىزمەتى دە پىكىر ءبىلدىردى.

«الدىن الا مالىمەتتەر بويىنشا شابۋىل پروكسي-سەرۆەرلەر ارقىلى جۇزەگە اسىرىلدى، بۇل دەرەك بويىنشا مەملەكەتتىك تەحنيكالىق قىزمەت اسەر ەتۋ كوزىن انىقتاۋ ءۇشىن ءبىرقاتار تەحنيكالىق شارا جۇرگىزىپ جاتىر»، - دەلىنگەن جاۋاپتا.

ەسكە سالايىق، كەشە رەسەي پرەزيدەنتى ۆلاديمير پۋتيننىڭ قازاقستانعا مەملەكەتتىك ساپارىنا وراي استانانىڭ اينالاسىنا رەسەيلىك تۋلار ءىلىندى. ولار ەلەكترون ديسپلەيلەردە دە پايدا بولدى. كەشكە كۋاگەرلەر جەلىدە «استانا وپەرا» تەاترىنىڭ جانىنداعى LED- ەكراندا رەسەي تۋىنىڭ ورنىنا ۋكراينا تۋىنا اۋىسقانىن بايقاعان. «كەرۋەن مەديا» ج ش س مۇنى تەحنيكالىق اقاۋ دەپ ءتۇسىندىردى. جەلىدە حاكەرلىك شابۋىل تۋرالى اقپارات پايدا بولدى.