استاناداعى سپورت سارايلارى حالىقارالىق جارىستاردى قابىلداي الادى - ماريۋس ۆيزەر

استانا. KAZINFORM - قازاقستانعا رەسمي ساپارمەن كەلگەن حالىقارالىق دزيۋدو فەدەراتسياسىنىڭ (IJF) پرەزيدەنتى ماريۋس ۆيزەر ەلورداداعى سپورت نىساندارىن ارالاپ، جۇمىس بارىسىمەن تانىستى.

ق ر تۋريزم جانە سپورت مينيسترلىگىنىڭ باسپا ءسوز قىزمەتىنەن ءمالىم ەتكەنىندەي، ماريۋس ۆيزەر ەڭ الدىمەن 2019-جىلى پايدالانۋعا بەرىلگەن جاقسىلىق ۇشكەمپىروۆ اتىنداعى جەكپە-جەك سارايىنا باردى.

جەكپە-جەك سارايى - كۇرەس تۇرلەرى (گرەك-ريم، ەركىن، ايەلدەر كۇرەسى، دزيۋدو، كاراتە، تاەكۆوندو، ارالاس جەكپە-جەك) بويىنشا حالىقارالىق جارىستاردى وتكىزۋ مۇمكىندىگى بار بىرەگەي سپورت كەشەنى.

IJF باسشىسى سونداي-اق قۇرىلىسى 2025-جىلدىڭ سوڭىندا اياقتالاتىن ۇلتتىق سپورت ۋنيۆەرسيتەتىنىڭ قۇرىلىسىمەن تانىستى.

بۇدان بولەك مارتەبەلى مەيمان بالعىن بالۋان بالالارمەن، بەلگىلى قازاقستاندىق سپورتشىلارمەن كەزدەستى. ولاردىڭ قاتارىندا پاريج وليمپياداسىنىڭ قولا جۇلدەگەرى عۇسمان قىرعىزبايەۆ، پاريج پاراليمپياداسىنىڭ چەمپيونى اقمارال ناۋاتبەك، الەم جانە ازيا بىرىنشىلىگىنىڭ جۇلدەگەرى ءابيبا ءابۋجاقىنوۆا، 2009-جىلعى الەم چەمپيونى ماكسيم راكوۆ بولدى. كەزدەسۋ بارىسىندا قازاقستاندا دزيۋدو سپورتىن دامىتۋ جانە حالىقارالىق ارەناعا شىعۋ مۇمكىندىگى ءسوز بولدى.

«استاناعا كەلگەنىمە جانە سىزدەرمەن كەزدەسكەنىمە قۋانىشتىمىن. بۇگىن بىرنەشە سپورت كەشەنىن ارالاپ، تاماشا سپورت ينفراقۇرىلىمدارىمەن تانىستىم. بۇل نىسانداردىڭ كەز كەلگەنى حالىقارالىق دەڭگەيدەگى جارىستاردى قابىلداۋعا مۇمكىندىگى بار. سونداي-اق استانادا سالىنىپ جاتقان ۇلتتىق سپورت ۋنيۆەرسيتەتىنىڭ قۇرىلىسىن كوردىم. بىرەگەي ءبىلىم ورداسى قازاقستاننىڭ سپورت سالاسىنداعى كاسىبي ماماندارىن دايارلاۋدا ماڭىزدى ءرول اتقارارى داۋسىز»، - دەپ اتاپ ءوتتى ۆيزەر.

ەسكە سالا كەتەيىك، بۇدان بۇرىن ابزال اجىعاليەۆتىڭ مۇز جانە جىلدامدىق وزىنە وتە ۇنايتىنى تۋرالى ايتقانىن جازعان بولاتىنبىز.