استاناداعى كولىك كەپتەلىسى ماسەلەسى وتە وزەكتى بولىپ تۇر - مەملەكەت باسشىسى
استانا. KAZINFORM - ەلوردا اكىمى تياناقتى جۇمىس ىستەپ وتىر. بۇل تۋرالى ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ ءمالىم ەتتى.

- استانادا قوردالانعان ماسەلەلەردى شەشۋ جانە قالانى اباتتاندىرۋ ءۇشىن كوپ جۇمىس اتقارىلىپ جاتىر. ءبارىمىز كۋامىز. جالپى، قالا اكىمىنىڭ ءتيىستى قابىلەتى بار، تياناقتى جۇمىس ىستەپ وتىر. دەگەنمەن، استانادا كولىك كەپتەلىسى ماسەلەسى وتە وزەكتى بولىپ تۇر. سوندىقتان وسى باعىتتا شۇعىل شارالار مەن شەشىمدەر قابىلداۋ قاجەت، - دەدى قاسىم-جومارت توقايەۆ.
سونىمەن قاتار پرەزيدەنت تاعى ءبىر ماڭىزدى مىندەت رەتىندە تۇرمىستىق قالدىقتاردى وڭدەيتىن كاسىپورىندار سالۋ كەرەك ەكەنىن اتاپ ءوتتى.
- بۇل ماسەلە تەك ەلورداعا ەمەس، بارلىق وبلىستاردىڭ باستى قالالارىنا قاتىستى. سالىنىپ جاتقان تۇرعىن ۇيلەردىڭ ساپاسى، جەراستى كوممۋنيكاتسيالارىنىڭ قۇرىلىسى جانە جوندەۋ جۇمىستارى باستى نازاردا بولۋى قاجەت، - دەدى مەملەكەت باسشىسى.
بۇدان بۇرىن حابارلانعانداي، پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر.
مەملەكەت باسشىسى 2024 -جىلدى ەلىمىز وڭ كورسەتكىشتەرمەن اياقتاعانىن ايتتى.
اۆتور
رۋسلان عابباسوۆ