استاناداعى حوستەلدەردە ورتكە قارسى رەيد جۇرگىزىلدى
استانا قالاسىندا رەسمي تۇردە 229 قوناق ءۇي مەن 80 جاتاقحانا جۇمىس ىستەيدى، دەپ حابارلايدى Kazinform.
قىستىڭ العاش كۇنىندە استانا قالاسىنىڭ پوليتسيا جانە توتەنشە جاعدايلار دەپارتامەنتتەرىنىڭ قىزمەتكەرلەرى Amanat پارتياسىنىڭ ەرىكتىلەرىمەن بىرگە الماتى اۋدانىنداعى جەكە تۇرعىن ءۇي ماسسيۆىن، جاتاقحانالار مەن حوستەلدەردى، باراك تيپىندەگى جالدامالى باسپانالاردى، ساياجاي سەكتورىن ارالاپ، ءورت قاۋىپسىزدىگى جونىندە ءتۇسىندىرۋ جۇمىستارىن جۇرگىزدى.
توتەنشە جاعدايلار دەپارتامەنتىنىڭ دەرەگى بويىنشا، بۇگىنگى تاڭدا استانا قالاسى بويىنشا رەسمي تۇردە 229 قوناق ءۇي مەن 80 حوستەل جۇمىس ىستەيدى.
«بۇگىن الماتى اۋدانىنداعى 20 حوستەلدى ارالادىق. نەگىزى استانا قالاسى اكىمدىگىنىڭ رەسمي مالىمەتى بويىنشا، قالادا 80 حوستەل بار. جالپى قالادا جالعا بەرىلەتىن ءۇي وتە كوپ. سوندىقتان ءبىز پوليتسيامەن بىرلەسىپ، وسىنداي شارالار وتكىزەمىز»، - دەيدى استانا قالاسى توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسى باستىعىنىڭ مىندەتىن اتقارۋشى ماديار مىرزاگەلديەۆ.
ونىڭ سوزىنشە، جىلىتۋ ماۋسىمى باستالعاننان بەرى «جاتاقحانا» جەدەل-الدىن الۋ ءىس-شاراسى اياسىندا باسپانا رەتىندە جالعا بەرىلگەن 257 نىساندى ارالاۋ جۇمىستارى جۇرگىزىلگەن.
جالپى جىل باسىنان بەرى استانا قالاسىنىڭ اۋماعىندا 549 ءورت تىركەلگەن. ونىڭ ىشىندە تۇرعىن ءۇي سەكتورىندا 223 ءورت بولعان. تۇرعىن ءۇي سەكتورىنداعى ورتتەردەن جىل باسىنان بەرى 12 ادام قازا تاپقان. 27 ادام ءتۇرلى دارەجەدەگى جاراقاتتار السا، 38 ادام تۇتىنگە ۋلانعان.
اۋلا ارالاۋ كەزىندە پوليتسيا وكىلدەرى مەن توتەنشە جاعداي قىزمەتىنىڭ ماماندارى جاتاقحانا جانە باسقا دا كوممەرتسيالىق قىزمەت ءۇشىن پايدالانىلاتىن تۇرعىن ۇيلەرگە ەرەكشە نازار اۋداردى.
