استاناداعى اسكەري پارادتى قايدان تاماشالاۋعا بولادى
استانا. KAZINFORM - استانادا جەڭىستىڭ 80 جىلدىعى مەن وتان قورعاۋشى كۇنىنە ارنالعان اسكەري پارادقا قىزۋ دايىندىق ءجۇرىپ جاتىر. بۇل شارا 2025 -جىلدىڭ باستى وقيعالارىنىڭ ءبىرى بولماق. مەرەكەلىك شەرۋ 7 -مامىردا استاناداعى تاۋەلسىزدىك الاڭىندا وتەدى، دەپ حابارلايدى Kazinform اگەنتتىگى.
سالتاناتتى ءىس- شاراعا 4000 نان استام اسكەري قىزمەتشى، 200 دەن استام اسكەري تەحنيكا، سونداي- اق مايداندىق، ارميالىق جانە اسكەري- كولىكتىك اۆياتسيانىڭ 66 ۇشاعى مەن تىكۇشاعى قاتىسادى.
قازاقستان قارۋلى كۇشتەرىنىڭ كۇش-قۋاتىن ايشىقتايتىن سالتاناتتى شەرۋ رەسپۋبليكالىق تەلەارنالاردان، ەلىمىزدىڭ بارلىق قالاسىندا LED ەكرانداردان، قورعانىس مينيسترلىگىنىڭ رەسمي YouTube ارناسىنان تىكەلەي ەفيردە كورسەتىلەدى.
ايتا كەتەيىك، پرەزيدەنت تەلەراديوكەشەنىنىڭ Jibek Joly تەلەارناسىنان اسكەري پارادتى تىكەلەي ەفيردە تاماشالاۋعا بولادى.
بۇل كۇندەرى اسكەري تەحنيكانىڭ قاۋىپسىز ءجۇرۋىن قامتاماسىز ەتۋ ءۇشىن ءبىرقاتار كوشەدە ۋاقىتشا شەكتەۋلەر ەنگىزىلىپ، اۆتوبۋس باعىتتارى وزگەرەدى، كەيبىر جاياۋ جۇرگىنشىلەر وتكەلدەرى جابىلادى.
بۇعان دەيىن Kazinform اگەنتتىگى دالالىق جاعدايدا ءومىر ءسۇرىپ، ايتۋلى شاراعا دايىندىقتى پىسىقتاپ جاتقان اسكەريلەردىڭ تىنىس- تىرشىلىگىن كورسەتكەن ەدى.
