استانادا زاڭسىز سالىنعان 6 نىسان بويىنشا قىلمىستىق ءىس قوزعالدى
استانا. KAZINFORM - استانا حالقىنىڭ سانى جىل ساناپ ارتىپ كەلەدى. تۇرعىن سانى كوبەيگەن سايىن باسپانا مەن الەۋمەتتىك نىساندارعا دا سۇرانىس ەسەلەپ وسەتىنى تۇسىنىكتى.
ونىڭ ۇستىنە، ەلوردانى جايلى قالاعا اينالدىرۋ ماسەلەسى تاعى بار. «اكىمگە سۇراق» ايدارىندا استانا قالاسىنىڭ اكىمى جەڭىس قاسىمبەكتەن سۇحبات قۇردىق.
«وتكەن جىلى جۇرتشىلىق نارازىلىق ءبىلدىرىپ، جەدەل شەشىمدى تالاپ ەتكەن 20 دان استام وبەكت بولدى. سوعان سايكەس قالا جوسپارىنا وزگەرىستەر ەنگىزىلىپ، بارلىق شەشىم تۇرعىنداردىڭ پىكىرى ەسكەرىلە وتىرىپ قابىلداندى. تىعىز قۇرىلىس وبەكتىلەرىنە قاتىستى وڭ شەشىمدەر بار. وسىلايشا 20 تۇرعىن ءۇي كەشەنىنىڭ ورنىنا الەۋمەتتىك نىساندار تۇرعىزىلاتىن بولدى. اتاپ ايتقاندا، مەكتەپ، ءبىلىم بەرۋ ورتالىقتارى مەن دەنساۋلىق ساقتاۋ مەكەمەلەرى سياقتى 8 الەۋمەتتىك وبەكت جانە 9 قوعامدىق كەڭىستىك (3 مەكتەپ، 2 ءبىلىم ورتالىعى، 8 سكۆەر، 1 ساياباق جانە 3 الەۋمەتتىك نىسان) قۇرىلىسى جوسپارلانىپ وتىر»، - دەيدى اكىم.
اكىمنىڭ ايتۋىنشا، ەلوردادا رۇقسات الماي، ءتيىستى قۇجاتسىز سالىنعان 40 تان استام كوپ پاتەرلى تۇرعىن ءۇي انىقتالدى. جاۋاپتى مەردىگەر كومپانيالارعا جۇمىستارىن توقتاتۋ تۋرالى ۇيعارىم بەرىلىپ، اتالعان سۋبەكتىلەر اكىمشىلىك جاۋاپكەرشىلىككە تارتىلدى. ودان بولەك، 6 نىسان بويىنشا قىلمىستىق ءىس قوزعالدى.
«ءاربىر كوپ پاتەرلى تۇرعىن ءۇي كەشەنىنىڭ وزىندىك تاريحى بار. ماسەلەن، ءبىر جەردە ءۇيدىڭ جاقتاۋى عانا كوتەرىلسە، تاعى ءبىر جەردە تەك شۇڭقىرى عانا قازىلعان. كەيبىر قۇرىلىس سالۋشىلار ءبىر پاتەردى 3-4 ادامعا ساتقان ساتتەر دە كەزدەستى. سول سياقتى اۆتوتۇراقتىڭ پاتەر رەتىندە ساتىلعان كەزدەرى دە بولدى، ال ەندى ءبىر جەردە مۇلدەم جوسپاردا جوق پاتەر ساتىلعان»، - دەيدى جەڭىس قاسىمبەك.
اكىمگە قويىلعان سۇراقتار اراسىندا كادر ءجان قوعامدىق كولىك تاپشىلىعى، بۇزاقىلارمەن كۇرەس، الداعى كوكتەمگە دايىندىق ماسەلەلەرى دە بار.
