استانادا زاڭسىز جۇمىس ىستەگەن فيليپپيندىك قىزدار ۇستالدى

ەلوردالىق ساقشىلار كوشى-قون زاڭناماسىن بۇزعان ءبىرقاتار ازاماتتاردى ۇستادى.

پوليتسيا قىزمەتكەرلەرىنىڭ مالىمەتىنشە، «قۇقىقتىق ءتارتىپ» رەسپۋبليكالىق جەدەل- پروفيلاكتيكالىق ءىس-شاراسى بارىسىندا ەسىل اۋداندىق كوشى-قون قىزمەتىنىڭ قىزمەتكەرلەرى تازالىق (كلينينگ) مەكەمەسىندە جۇمىس ىستەيتىن ازاماتتاردىڭ زاڭبۇزۋشىلىقتارعا جول بەرگەنىن انىقتاعان.

كومپانيادا جۇمىس ىستەگەن فيليپپين رەسپۋبليكاسىنىڭ 8 ازاماتىنىڭ ۇشەۋى كوشى-قون زاڭناماسىن بۇزعان. ەكى شەتەلدىك ايەل قازاقستان رەسپۋبليكاسىنىڭ اۋماعىندا زاڭسىز ەڭبەك قىزمەتىمەن اينالىسقان. اتالعان ازاماتتار ۆيزا بويىنشا الماتى قالاسىندا جۇمىس ىستەۋى كەرەك بولسا، ولار جۇمىسىن استانا قالاسىندا جالعاستىرعان.

قۇقىق بۇزۋشىلارعا قاتىستى ا ق ب ت ك 517-بابىنىڭ 5-بولىگى («شەتەلدىكتىڭ نەمەسە ازاماتتىعى جوق ادامنىڭ قازاقستان رەسپۋبليكاسىنىڭ حالىقتىڭ كوشى-قونى سالاسىنداعى زاڭناماسىن بۇزۋى») بويىنشا 10 تاۋلىككە دەيىن قاماۋعا الۋ نەمەسە قازاقستاننان شىعارىپ جىبەرۋ كوزدەلەتىن اكىمشىلىك ءىس قوزعالدى، - دەلىنگەن حابارلامادا.

سونىمەن قاتار جەكە باسىن كۋالاندىراتىن قۇجاتتارى جوق ءبىر ازامات پ د- نىڭ قابىلداپ-تاراتۋ ورنىنا ورنالاستىرىلدى. شەتەل ازاماتتارى زاڭسىز جۇمىس ىستەگەن جۇمىس بەرۋشىنىڭ كاسىپورنى قازاقستان رەسپۋبليكاسىنىڭ زاڭناماسىن بۇزا وتىرىپ، شەتەلدىك كۇشتەردى تارتقانى ءۇشىن ا ق ب ت ك- ءنىڭ 519-بابى («شەتەلدىك جۇمىس كۇشىن جانە ەڭبەكشى كوشىپ كەلۋشىلەردى قازاقستان رەسپۋبليكاسىنىڭ زاڭناماسىن بۇزا وتىرىپ تارتۋ») بويىنشا اكىمشىلىك جاۋاپكەرشىلىككە تارتىلدى.

Halyq Uni