استانادا وتەتىن 5-دۇنيەجۇزىلىك كوشپەندىلەر ويىندارىنىڭ باس دەمەۋشىسى بەلگىلى بولدى

игры кочевников
Фото: Дирекция по подготовке и проведению 5-х Всемирных игр кочевников

استانا. قازاقپارات - 5-دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسياسى «Alageum Electric» كومپانيالار توبىمەن ەكىجاقتى مەموراندۋمعا قول قويدى.

مەموراندۋم نەگىزىندە «Alageum Electric» بەسىنشى دۇنيەجۇزىلىك كوشپەندىلەر ويىندارىنىڭ رەسمي باس دەمەۋشىسى بولىپ تانىلدى.

شاراعا 5-دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىسى نايل نۇروۆ پەن «Alageum Electric» ك ت ديرەكتورلار كەڭەسىنىڭ ءتوراعاسى ەركەبۇلان ءىلياسوۆ قاتىستى.

«وتاندىق الپاۋىت كومپانيانىڭ جىلدىڭ ەڭ ماڭىزدى وقيعاسى - 5-دۇنيەجۇزىلىك كوشپەندىلەر ويىندارىنا قىزىعۋشىلىق تانىتۋى وتاندىق سپورتقا، ونىڭ ىشىندە ۇلتتىق سپورتقا دەگەن جوعارى قۇرمەتتى كورسەتەدى. ءبىز Alageum Electric كومپانياسىنىڭ 5-دۇنيەجۇزىلىك كوشپەندىلەر ويىندارىنىڭ ءبىر بولىگى بولعانىنا قۋانىشتىمىز»، - دەدى ديرەكتسيا باسشىسى نايل نۇروۆ.

ۇلتتىق سپورت تۇرلەرىن قولداۋ جانە ولاردى ودان ءارى دامىتۋ جونىندەگى جۇمىستى جۇيەلەۋ ماقساتىندا 2024-جىلى «ۇلتتىق سپورت تۇرلەرىن قولداۋ قورى» قوعامدىق قورى قۇرىلدى.

«ۇلتتىق سپورت قورىنىڭ» باستى ماقساتى: ۇلتتىق سپورت تۇرلەرىن دامىتۋ، سپورتشىلار مەن جاتتىقتىرۋشىلاردى قولداۋ، ۇلتتىق ءداستۇر مەن مادەنيەتتى ناسيحاتتاۋ ءارى ساقتاۋ. ودان بولەك ۇلتتىق سپورت تۇرلەرىنەن وتەتىن جارىستاردىڭ ساپالى وتۋىنە، سپورتشىلارعا قارجىلىق جانە ماتەريالدىق كومەك كورسەتۋگە، جاتتىقتىرۋشىلار مەن تورەشىلەردىڭ بىلىكتىلىگىن ارتتىرۋعا جانە دامۋ باعدارلامالارىن ىسكە اسىرۋعا ىقپال جاساپ، ۇلتتىق سپورت تۇرلەرىن زەرتتەۋ جانە دامىتۋ بويىنشا عىلىمي-زەرتتەۋ جۇمىستارىن اتقارۋ قوردىڭ تىكەلەي قىزمەتى بولماق.

«ءبىزدىڭ كومپانيا ءارقاشان ەلىمىزدىڭ مادەني جانە سپورتتىق ءداستۇرىن قولداۋعا جانە دامىتۋعا ۇمتىلادى. دۇنيەجۇزىلىك كوشپەندىلەر ويىندارىنىڭ باس دەمەۋشىسى مارتەبەسى - بۇل ءبىزدىڭ اعىمداعى جۇمىسىمىزدىڭ جالعاسى دەپ ساناۋعا بولادى. ءبىز حالىقارالىق ارەنادا ءداستۇرلى سپورت تۇرلەرىن ناسيحاتتاۋعا ءوز ۇلەسىمىزدى قوسا الۋىمىزدى ماقتان تۇتامىز»، - دەدى «Alageum Electric» ك ت ديرەكتورلار كەڭەسىنىڭ ءتوراعاسى ەركەبۇلان ءىلياسوۆ.

«Alageum Electric» ەلەكتروتەحنيكا كومپانياسى قازاقستان رەسپۋبليكاسى تۋريزم جانە سپورت ءمينيسترى ەرمەك مارجىقپايەۆتىڭ تىكەلەي مۇرىندىق بولۋىمەن 5-دۇنيەجۇزىلىك كوشپەندىلەر ويىندارىن قولداۋعا نيەت ءبىلدىردى. بۇل ماڭىزدى قادام كومپانيانىڭ ۇلتتىق سپورت تۇرلەرىن قولداۋ جانە دامىتۋ جولىنداعى ادالدىعىن، سونىمەن قاتار الەۋمەتتىك جاۋاپكەرشىلىگىن، تامىرىنا جانە حالىقتىڭ تاريحي مۇراسىنا دەگەن قۇرمەتىن كورسەتەدى.

ەستەرىڭىزگە سالا كەتەيىك، ەتنيكالىق سپورت تۇرلەرىنەن وتكىزىلەتىن حالىقارالىق سپورت جارىستارى - 5-دۇنيەجۇزىلىك كوشپەندىلەر ويىندارى 8-13-قىركۇيەك ارالىعىندا استانا قالاسىندا وتەدى. ءىس-شارادا 89 ەلدەن 2000 نان استام قاتىسۋشى بولادى دەپ جوسپارلانۋدا. 5- دۇنيەجۇزىلىك كوشپەندىلەر ويىندارىنىڭ باس دەمەۋشىسى - ALAGEUM ELECTRIC، ويىنداردىڭ باس سەرىكتەسى - Halyk Bank. استانادا وتەتىن دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.

اۆتور كۇنسۇلتان وتارباي

سوڭعى جاڭالىقتار