استانادا وشكەن جارىق 7 اۋرۋحانانىڭ جۇمىسىنا اسەر ەتكەن
كەشەگى استانانىڭ ەنەرگەتيكا جۇيەسىندەگى اقاۋ مەديتسينالىق مەكەمەلەردىڭ جۇمىسىن قيىنداتقان، دەپ حابارلايدى Kazinform اگەنتتىگى.
استانا قالالىق دەنساۋلىق ساقتاۋ باسقارماسىنىڭ مالىمەتى بويىنشا، 1№ كوپسالالى اۋرۋحانا قىزمەتكەرلەرى ەلەكتر قۋاتىنىڭ اجىراتىلۋىنا بايلانىستى ناۋقاستى جانساقتاۋ بولىمىنە ليفتىسىز، باسپالداقپەن كوتەرگەن.
«ەلەكتر قۋاتى ءوشىپ قالعان كەزدە ناۋقاس ايەلدى دۇرىس باقىلاۋ ءۇشىن جانساقتاۋ بولىمىنە باسپالداقپەن كوتەرىپ شىعاردىق. ويتكەنى ليفتىلەر جۇمىس ىستەمەي قالعان ەدى»، - دەيدى باسقارمانىڭ باسپا ءسوز قىزمەتىندەگىلەر.
قازىر اتالعان ناۋقاستىڭ جاعدايى ءبىرقالىپتى.
ۆەدومستۆونىڭ اقپاراتى بويىنشا، ەلەكتر جارىعىنىڭ ءوشۋى قالالىق مەديتسينالىق مەكەمەنىڭ جۇمىسىنا اسەر ەتكەن.
ابىروي بولعاندا ول مەكەمەلەردىڭ ءبارى گەنەراتورعا جالعانىپ، توك ۇزدىكسىز بەرىلگەن.
«قالا اۋرۋحانالارىنىڭ ءبارى گەنەراتورعا جالعانعان. جارىق وشكەندە وزدىگىنەن سول گەنەراتور قوسىلادى. الماتى جانە بايقوڭىر اۋداندارىنداعى اۋرۋحانالار مەديتسينالىق مەكەمەلەردى گەنەراتور كومەگىمەن ءىشىنارا ەلەكترگە جالعادى. ياعني، ەلەكتر قۋاتى جانساقتاۋ جانە قارقىندى تەراپيا بولىمدەرىنە، وتا جاسايتىن بولىمشەلەرگە باسىمدىقپەن بەرىلدى. قالعان بولىمشەلەر مەن پالاتالاردا جارىق بولعان جوق. ويتكەنى گەنەراتورلاردى ءبىرىنشى كەزەكتە جانساقتاۋ جانە وتا جاسايتىن بولىمدەرگە بەرۋ قاجەت بولدى. اپات سالدارى جويىلعاننان كەيىن اۋرۋحانالاردىڭ بۇكىل بلوگىنا جارىق بەرىلدى. ەلەكتر قۋاتى اجىراتىلعان كەزەڭدە اۋرۋحانالاردا ەشقانداي شۇعىل وتا جاسالعان جوق»، - دەلىنگەن باسقارمانىڭ مالىمەتىندە.
ايتا كەتەيىك، كەشە تۇندە استانانىڭ بىرنەشە اۋدانىندا جارىق ءسونىپ، سالدارىنان كوممۋنالدىق قىزمەتتە اقاۋ پايدا بولعان ەدى.
