استانادا تۇركى مەملەكەتتەرى ۇيىمىنا مۇشە ەلدەردىڭ سامميتى وتەدى
قاراشادا قازاقستاننىڭ ءتوراعالىق ەتۋىمەن تۇركى مەملەكەتتەرى ۇيىمىنا مۇشە ەلدەر باسشىلارىنىڭ قاتىسۋىمەن 10- مەرەيتويلىق سامميت وتەدى.

بۇل تۋرالى ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىن ءبىزدىڭ ينستيتۋت تۇركى مەملەكەتتەرى ۇيىمىنىڭ زەرتتەۋ ورتالىقتارىنىڭ وتىرىسىن وتكىزىپ جاتىر. بيىل 3- قاراشادا استانادا قازاقستاننىڭ ءتوراعالىق ەتۋىمەن تۇركى مەملەكەتتەرى ۇيىمىنا مۇشە ەلدەر باسشىلارىنىڭ قاتىسۋىمەن 10- مەرەيتويلىق سامميت وتەدى. وسىعان وراي قالىپتاسقان ءداستۇر بويىنشا ساراپشىلار سامميت الدىندا جينالىپ وتىر. ايتىلعان نەگىزگى ويلار مەن ۇسىنىمدار مەملەكەت باسشىلىعىنا ۇسىنىس رەتىندە جولدانادى» - دەدى ەركىن تۇقىموۆ ەلوردادا ءوتىپ جاتقان تۇركى مەملەكەتتەرى ۇيىمىنا مۇشە ەلدەردىڭ وكىلدەرىمەن كەزدەسۋدە.
سونداي-اق، ينستيتۋت باسشىسى تۇركى مەملەكەتتەرى ۇيىمى ەلدەرىنىڭ ءوزارا ارەكەتتەسۋىنە توقتالدى.
«تۇركى كەڭەسىنىڭ تۇركى مەملەكەتتەرى ۇيىمىنا اينالۋى ىنتىماقتاستىعىمىزدىڭ تەرەڭدەي تۇسكەنىن كورسەتتى. بۇل ەلدەرىمىزدىڭ بىرلەسكەن تاريحىنداعى جاڭا بەلەستى بەلگىلەدى. ءبىز الدىمىزعا ەكونوميكالىق ىنتىماقتاستىقتى تەرەڭدەتۋگە جانە كولىكتىك ءوزارا بايلانىستى دامىتۋعا باعىتتالعان ستراتەگيالىق ماقساتتار قويىپ وتىرمىز»، - دەيدى ول.