استانادا سۋ تاپشىلىعى جوق - جەڭىس قاسىمبەك

  استانادا الداعى بىرنەشە جىلدا سۋ تاپشىلىعى بولمايدى. بۇل تۋرالى ەلوردا اكىمى جەڭىس قاسىمبەك ايتىپ بەردى، دەپ حابارلايدى Kazinform.

«ماۋسىم ايىندا سۋ تاپشىلىعى ماسەلەسى بولعانىن بىلەسىزدەر. جىل سايىن قالا ءوسىپ كەلەدى، حالىق سانى ورتا ەسەپپەن 50-60 مىڭعا ارتۋدا. سوڭعى ءۇش جىلدا حالىق سانى 200 مىڭعا ءوستى. تيىسىنشە، كوممۋنالدىق قىزمەتتەردى تۇتىنۋ كولەمى دە ارتادى. پايدالانۋعا بەرىلەتىن باسپانا مەن سۋ تۇتىنۋ كولەمى ارتىپ كەلەدى. ماۋسىم ايىندا بىزدە بۇل ماسەلە كۇرت كوتەرىلگەن ساتتە تاۋلىگىنە 20-25 مىڭ تەكشە مەتر سۋ تاپشىلىعى بولدى. 10-ماۋسىمنان كەيىن استانا سۋ قويماسىنان قوسىمشا جاڭا سۋ قۇبىرى جەلىسىن ىسكە قوستىق. 90 مىڭ تەكشە مەتر كولەمىندە قوسىمشا سۋ بەرىلىپ، قۋاتى 105 مىڭ تەكشە مەتر بولاتىن ءۇشىنشى سورعى سۇزگى ستانتسياسىنىڭ قۇرىلىسى اياقتالدى»، - دەپ ءتۇسىندىردى اكىم ورتالىق كوممۋنيكاتسيالار قىزمەتىندە.

استانا اكىمى رەسمي تۇردە استانادا سۋ تاپشىلىعى جوق ەكەنىن مالىمدەدى.

اكىمنىڭ ايتۋىنشا، الداعى بىرنەشە جىلعا بەرىكتىك نەگىزى جاسالعان.

«وعان قوسا، ءبىز استانا سۋ قويماسىنان ەكىنشى قوسىمشا سۋ قۇبىرىنىڭ قۇرىلىسىن اياقتايمىز، نۇرا سۋ كوزىنە قۇبىر قۇرىلىسىن، سونداي- اق «تەلمان» سورعى ستانتسياسىنىڭ كەڭەيۋىن جوبالاۋدى باستايمىز. بۇل بىزگە 2030 -جىلعا دەيىن تازا اۋىز سۋ الۋ مۇمكىندىگىن بەرەدى»، - دەدى جەڭىس قاسىمبەك.

بۇعان دەيىن جەڭىس قاسىمبەك قار كۇرەۋدەن ۇنەمدەلگەن قاراجات قايدا جۇمسالاتىنىن ايتقان ەدى.