استانادا ەر ادامعا پىشاقپەن شابۋىلداعان كۇدىكتىنى ۇستاعان ۇلاندىقتار ماراپاتتالدى
استانا. KAZINFORM - ەلوردادا ەر ادامعا پىشاقپەن شابۋىل جاساعان كۇدىكتىنى ۇستاعان ق ر ءى ءى م ۇلتتىق ۇلان ساربازدارى ماراپاتتالدى، دەپ حابارلايدى ۆەدومستۆونىڭ باسپا ءسوز قىزمەتى.
باسپا ءسوز قىزمەتىنىڭ مالىمەتتەرىنە قاراعاندا، 12-قىركۇيەك كۇنى ۇلتتىق ۇلاننىڭ ەلورداداعى اسكەري قالاشىعىندا ۇلتتىق ۇلاننىڭ 5451 اسكەري ءبولىمىنىڭ ساربازدارى ىشكى ىستەر ءمينيسترىنىڭ ورىنباسارى - ۇلتتىق ۇلان باس قولباسشىسىنىڭ بۇيرىعىمەن «ۇلتتىق ۇلان قىزمەتىنىڭ ۇزدىگى» توسبەلگىسىمەن ماراپاتتالدى.
ماراپاتتى جاۋىنگەرلەرگە ۇلتتىق ۇلان باس شتاب باستىعىنىڭ ورىنباسارى - جەدەل باسقارۋ باس باسقارماسىنىڭ باستىعى پولكوۆنيك ەرلان جاقىپوۆ تابىستادى.
- قالا تىنىشتىعىن ساقتاۋ - ءبىزدىڭ باستى مىندەتىمىز. باس قالادا ءوتىپ جاتقان اۋقىمدى شارا كەزىندە تۇرعىندار مەن قوناقتاردىڭ قاۋىپسىزدىگىن قورعاۋعا ەرەكشە ءمان بەرۋدەمىز. سوندىقتان، كەز كەلگەن جاعدايعا دايىنبىز، كومەككە جەدەل بارامىز. ءاربىرىڭىز قالا كوشەلەرىنەن اسكەري جاساقتاردى كورىپ جۇرگەن بولارسىزدار. مىنەكەي، سول ساربازداردىڭ قىراعىلىعىنىڭ ارقاسىندا كۇن سايىن ءتۇرلى قىلمىستىق وقيعالارعا توسقاۋىل قويىلىپ، ەسىرتكىمەن، قارۋمەن جۇرگەن، قوعامعا ءقاۋىپتى ازاماتتار قۇرىقتالادى. جوعالعان بالالار اتا- اناسىنا، تابىلعان زاتتار يەلەرىنە قايتارىلادى. ادام ومىرىنە اراشا تۇسكەن جاعدايلار دا از ەمەس، - دەيدى ۇلاندىق جاۋىنگەرلەر.
جوعارىدا اتالعان وقيعا 10-قىركۇيەك كۇنى بايقوڭىر اۋدانىندا بولعان. ءا. جانگەلدين كوشەسىندە قوعامدىق ءتارتىپ پەن قاۋىپسىزدىكتى قامتاماسىز ەتۋ كەزىندە پاترۋلدىك توپ باستىعى ەرماحان تورەبەكوۆ قانسىراپ جاتقان ادامدى بايقاپ قالعان. ول دەرەۋ جابىرلەنۋشىگە العاشقى مەديتسينالىق كومەك كورسەتىپ، جەدەل جاردەم مەن پوليتسيا قىزمەتكەرلەرىن شاقىرعان. سونداي-اق باقىلاۋ بەينەكامەرالارىنىڭ كومەگىمەن وقيعا ورنىنان قاشىپ كەتكەن كۇدىكتىنىڭ باعىتىن انىقتاعان. شۇعىل حابارلاما العان اسكەري جاساق باستىعى سەرجانت نۇرسۇلتان قايراتبەك جانە پاترۋلدەۋشى ساربازدار باقىتجان بورانبايەۆ پەن ياروسلاۆ فيكس جەدەل ىزدەستىرۋ شارالارىن ۇيىمداستىرىپ، كوپ ۇزاماي كۇدىكتىنى قاراساي باتىر كوشەسىندە قولعا تۇسىرەدى.
ايتا كەتەلىك، استانا قالاسىنىڭ تىنىشتىعىن كۇزەتۋگە ۇلتتىق ۇلاننان كۇندەلىكتى 1000-نان اسا اسكەري قىزمەتشى جۇمىلدىرىلادى.
