استانادا قىتايدىڭ 75 جىلدىعى اياسىندا قازاقستانمەن ىنتىماقتاستىق پەرسپەكتيۆالارى تالقىلاندى
استانا. KAZINFORM - استانادا «قىتاي حالىق رەسپۋبليكاسىنىڭ 75 جىلدىعى: جەتىستىكتەر مەن كەلەشەككە كوزقاراس» اتتى سەمينار ءوتتى.
شارانى قىتاي زەرتتەۋ ورتالىعى جانە KazEvent كومپانياسى ۇيىمداستىردى. شارا بارىسىندا ساراپشىلار قىتايدىڭ ترانسفورماتسياسىنىڭ نەگىزگى اسپەكتىلەرىن، ونىڭ جەتىستىكتەرى مەن قازاقستانمەن ىنتىماقتاستىق پەرسپەكتيۆالارىن تالقىلادى.
سەمينار جۇمىسىنا نازاربايەۆ ۋنيۆەرسيتەتىنىڭ، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ، ماقسۇت نارىكبايەۆ ۋنيۆەرسيتەتىنىڭ، امانات پارتياسىنىڭ، قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ (ق س ز ي) وكىلدەرى، سونداي-اق ب ا ق قىزمەتكەرلەرى قاتىستى.
سەميناردىڭ اشىلۋىندا قىتايدى زەرتتەۋ ورتالىعىنىڭ ديرەكتورى گۇلنار شايمەرگەنوۆا جانە ق ح ر- دىڭ قازاقستان رەسپۋبليكاسىنداعى ەلشىلىگىنىڭ كەڭەسشى-ۋاكىلى سين فانفان قۇتتىقتاۋ ءسوز سويلەدى.
ورتالىق ديرەكتورى سەسسيانى اشىپ، قاتىسۋشىلار مەن قوناقتاردى قارسى الدى جانە ءىس-شارانىڭ ماڭىزدىلىعىن اتاپ ءوتتى. ءوز سوزىندە ول قىتايدىڭ الەمدىك دەرجاۆالاردىڭ ءبىرى بولۋ ءۇشىن وتكەن 75 جىلدىق جولىنىڭ اۋقىمدىلىعى مەن ماڭىزدىلىعى ەرەكشە ءارى تاڭقالارلىق ەكەنىن ايتتى.
سونىمەن قاتار، گۇلنار شايمەرگەنوۆا سەمينار قاتىسۋشىلارىنىڭ نازارىن قىتايدىڭ نەگىزگى جەتىستىكتەرىنە اۋداردى. ەكونوميكالىق ترانسفورماتسيا ميلليونداعان ادامداردى كەدەيلىكتەن شىعارسا، قازاقستان ماڭىزدى ءرول اتقاراتىن «ءبىر بەلدەۋ، ءبىر جول» باستاماسى ەلدەر اراسىنداعى ساۋدا-ەكونوميكالىق جانە مادەني بايلانىستاردى نىعايتتى.
- لوگيستيكا، ەنەرگەتيكا جانە يننوۆاتسيا سالاسىنداعى بىرلەسكەن جوبالار بولاشاق ىنتىماقتاستىقتىڭ نەگىزىن قالاپ جاتىر، - دەدى ول.
ق ح ر- دىڭ قازاقستان رەسپۋبليكاسىنداعى ەلشىلىگىنىڭ كەڭەسشى-ۋاكىلى سين فانفان ءوز سوزىندە بۇل مەرەيتويدى ەل تاريحىنداعى ماڭىزدى كەزەڭ جانە حالىقارالىق ارەناداعى جەتىستىكتەردىڭ كورىنىسى رەتىندە اتاپ ءوتتى.
كەڭەسشى-ۋاكىل قازاقستان مەن قىتاي اراسىنداعى بايلانىستاردىڭ نىعايىپ كەلە جاتقانىن ايتىپ، ءتۇرلى سالالارداعى ىنتىماقتاستىقتىڭ ودان ءارى تەرەڭدەي تۇسەتىنىنە سەنىم ءبىلدىردى. ول سونداي-اق ەكى ەل حالقى اراسىنداعى دوستىقتى نىعايتۋعا جانە جەمىستى ديالوگ ءۇشىن پلاتفورما قۇرۋعا قوسقان ۇلەسى ءۇشىن شارانى ۇيىمداستىرۋشىلارعا العىس ايتتى.
سونىمەن قاتار، سەميناردا حالىقارالىق استانا ۋنيۆەرسيتەتىنىڭ الەۋمەتتىك-گۋمانيتارلىق عىلىمدار جوعارى مەكتەبىنىڭ پروفەسسورى لاززات نۇرسۇلتانوۆا، نازاربايەۆ ۋنيۆەرسيتەتىنىڭ بيزنەس جوعارى مەكتەبى ستراتەگيا جانە كاسىپكەرلىك كافەدراسىنىڭ دوتسەنتى دجيان دۋن، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ مەملەكەت جانە قۇقىق تەورياسى مەن تاريحى، كونستيتۋتسيالىق قۇقىق كافەدراسىنىڭ پروفەسورى جامالادەن يبراگيموۆ، جوو «قىتاي تۇلەكتەر دوستىعى قاۋىمداستىعىنىڭ» ءتورايىمى دجاميليا ەلەۋسىزوۆا، TALAP قولدانبالى زەرتتەۋلەر ورتالىعىنىڭ ديرەكتورى قىسىقوۆ اسقار جانە ق ر سىرتقى ىستەر مينيسترلىگى سىرتقى ساياسات زەرتتەۋلەرى ينستيتۋتىنىڭ «ق ر سىرتقى ساياساتىنىڭ ەلدىك باسىمدىقتارى» توبىنىڭ اعا زەرتتەۋشىسى ۇلان نۇحيتجان ءوز باياندامالارىن ۇسىندى.
سەمينار قورىتىندىسى بويىنشا ەكىجاقتى ىنتىماقتاستىقتى ودان ءارى نىعايتۋعا باعىتتالعان ناقتى ۇسىنىستار ازىرلەندى. مادەني ءوزارا ءىس-قيمىلدى دامىتۋعا، گۋمانيتارلىق بايلانىستاردى كەڭەيتۋگە جانە يننوۆاتسيالىق جوبالار بويىنشا بىرلەسكەن جۇمىسقا ەرەكشە نازار اۋدارىلدى. قاتىسۋشىلار مادەني ىنتىماقتاستىق پەن عىلىم، تەحنولوگيالار جانە ءبىلىم سالاسىنداعى بىرلەسكەن باستامالار ەكى ەل مۇددەلەرىنە سايكەس كەلەتىن «ورتاق تاعدىر قاۋىمداستىعىن» قۇرۋدىڭ سەنىمدى نەگىزىن قالايدى دەگەن ورتاق پىكىرگە كەلدى.
بۇعان دەيىن حابارلاعانىمىزداي، قازاقستان قىتايعا ماي ونىمدەرى ەكسپورتىن $250 ميلليون جەتكىزۋدى كوزدەپ وتىر.
