استانادا قوعامدىق ءتارتىپتى بۇزعاندار جازالاندى

استانا. KAZINFORM - ەلوردادا قوعامدىق ءتارتىپتى بۇزۋشىلارمەن جانە ۆانداليزمنىڭ كەز كەلگەن جاعدايىمەن كۇرەس جالعاسۋدا. قۇقىق قورعاۋ ورگاندارى قۇقىق بۇزۋشىلاردى انىقتاپ، ولاردى جاۋاپقا تارتادى، دەپ حابارلايدى استانا اكىمدىگىنىڭ رەسمي سايتى.

14-قاراشا كۇنى تاڭعى ساعات 5 شاماسىندا 29 جاستاعى استانالىق قوناق ءۇيدىڭ الدىڭعى ەسىگىن سىندىرىپ، بوتەننىڭ مۇلكىن قاساقانا ءبۇلدىردى.

سول كۇنى ساعات 20:30 شاماسىندا ەلوردانىڭ ويىن-ساۋىق ورىندارىنىڭ بىرىندە 33 جاستاعى قالا تۇرعىنى جانجال شىعاردى. اشۋ ۇستىندە ول بولمەنىڭ ەسىگى مەن قابىرعاسىن ادەيى زاقىمداعان. وسى ىسىمەن شامامەن 100 ا ە ك مولشەرىندە ماتەريالدىق شىعىن كەلتىردى.

تاعى ءبىر وقيعا 11-قاراشادا تۇسكى ۋاقىتتا بولدى. 34 جاستاعى ەر ادام قوعامدىق ورىندا ءوزىن دورەكى ۇستاپ، وزگەلەردى قورلاعان.

قوعامدىق ءتارتىپتى بۇزۋشىلاردىڭ ءبارى تابىلىپ، جاۋاپقا تارتىلدى.

ايتا كەتەيىك، جىل باسىنان بەرى استانادا ەرىكتىلەر، بەلسەندىلەر، تانىمال سپورتشىلار، قالا تۇرعىندارى قولداعان «توقتا، ۆاندال» اكسياسى اياسىندا پروفيلاكتيكالىق جۇمىس ءجۇرىپ جاتىر.

اكسيانىڭ ماقساتى - ۆانداليزمنىڭ كەز كەلگەن جاعدايىن بولدىرماۋ جانە ەلوردادا تازالىق پەن ءتارتىپتى ساقتاۋ.

جىل باسىنان بەرى سوت 275 ادامدى بوتەننىڭ مۇلكىن قاساقانا بۇلدىرگەنى، جالپى پايدالانۋ ورىندارىن لاستاعانى، عيماراتتار مەن تۇرعىن ءۇي- جايلاردى بۇلدىرگەنى ءۇشىن جازالادى. ولاردىڭ بارلىعى جاۋاپقا تارتىلدى.

ۆانداليزمنىڭ الدىن الۋ جۇمىستارى قالالىق پروكۋراتۋرا مەن پوليتسيا دەپارتامەنتىنىڭ ۇيلەستىرۋىمەن جۇرگىزىلەدى.