استانادا قۇرىلىسى ۇزاققا سوزىلعان كەزەكتى ەكى تۇرعىن ءۇي كەشەنى اياقتالدى

استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا قۇرىلىسى ۇزاققا سوزىلعان كەزەكتى ۇيلەر اياقتالىپ، پاتەر كىلتى تابىس ەتىلگەنىن جازدى، دەپ حابارلايدى ەلوردا اكىمدىگىنىڭ رەسمي سايتى.

«قۇرىلىسى ۇزاققا سوزىلعان ەكى تۇرعىن ءۇي كەشەنىنىڭ ۇلەسكەرلەرىنىڭ ماسەلەسىن شەشتىك. ولار - «تەرريتوريا كومفورتا-1» (ەكىنشى كەزەك) جانە «جاعالاۋ 4» پوليگون 3 كوپپاتەرلى تۇرعىن ءۇي كەشەندەرى. ەكى ءۇي دە باسىنان باستاپ قايتا سالىندى.

ماسەلەن، «تەرريتوريا كومفورتا» تۇرعىن ءۇي كەشەنىنىڭ قۇرىلىسى 20  جىل بۇرىن باستالعان. ءۇيدى تەحنيكالىق تەكسەرۋ كەزىندە نىساننىڭ اپاتتى جاعدايدا ەكەنى انىقتالدى. اپاتتى تۇرعىن ءۇي كەشەنىنىڭ بلوكتارىن تولىقتاي بۇزۋ بويىنشا اۋقىمدى جۇمىس جۇرگىزىلدى. وسىعان دەيىن 1-كەزەكتىڭ قۇرىلىسى اياقتالعان بولاتىن. ول كەزدە 100 دەن استام ۇلەسكەر وتباسى پاتەر كىلتىن العان.

بيىل ەكىنشى كەزەكتىڭ قۇرىلىسىن اياقتادىق. وسىلايشا، 20  جىلعا سوزىلعان ەڭ پروبلەمالى تۇرعىن ءۇي كەشەنىنىڭ تاريحى اياقتالدى.

ال «جاعالاۋ 4» پوليگون 3 قۇرىلىسى 10 جىل بۇرىن باستالعان. جوسىقسىز ارەكەت سالدارىنان مەردىگەرلەر اۋىسىپ، ءۇيدىڭ اياقتالۋ مەرزىمى وزگەردى. تۇرعىنداردىڭ جالپى جينالىسىندا ۇلەسكەرلەردى جاڭا «e16, e17, e32» ت ك- عا كوشىرۋ تۋرالى شەشىم قابىلدانعان. وسىلايشا، ۇلەسكەرلەر كوپتەن كۇتكەن باسپانالارىنىڭ كىلتىن الدى. اۋماقتى اباتتاندىرۋ كوكتەمدە جالعاسادى.

قۇرىلىسى ۇزاققا سوزىلعان نىسانداردىڭ اياقتالۋى مەملەكەت باسشىسىنىڭ باقىلاۋىندا. سوڭعى جىلدارى قۇرىلىسى ۇزاققا سوزىلعان 140 تان استام تۇرعىن ءۇي كەشەنىن اياقتادىق. كوپتەن كۇتكەن پاتەر كىلتىن 15,5 مىڭنان اسا ۇلەسكەر وتباسى الدى.

قالعان بىرنەشە ءۇيدى جىل سوڭىنا دەيىن اياقتاۋدى جوسپارلاپ وتىرمىز»، - دەپ جازدى جەڭىس قاسىمبەك.