استانادا قازاق ەلىنە العىس ايتۋ كۇنىندە قانداي ءىس-شارالار وتەدى
استانا. KAZINFORM - العىس ايتۋ كۇنىنە وراي استانادا ونداعان ءتۇرلى سپورتتىق، مادەني جانە تانىمدىق ءىس-شارالار وتەدى. بۇل تۋرالى ەلوردا اكىمدىگىنىڭ رەسمي سايتى جازدى.
ەلىمىزدە 1- ناۋرىز - العىس ايتۋ كۇنى اتاپ وتىلەدى. بيىل استانادا العىس ايتۋ كۇنىن مەرەكەلەۋ تاعى ءبىر ماڭىزدى وقيعامەن - قازاقستان حالقى اسسامبلەياسىنىڭ 30 جىلدىعىنا ارنالعان ءىس-شارالاردىڭ باستالۋىمەن ەستە قالماق.
مەرەكە كۇندەرى مادەنيەت، سپورت، ءبىلىم بەرۋ ۇيىمدارى، ەلوردالىق ق ح ا جانە باسقا دا مەكەمەلەر قالا تۇرعىندارى مەن قوناقتارى ءۇشىن ءتۇرلى ءىس-شارالار دايىنداپ وتىر. العىس ايتۋ كۇنىنە وراي استانادا سالت-داستۇرلەر مەن العىس ايتۋدىڭ ءتۇرلى تاسىلدەرىن دامىتۋعا باعىتتالعان تاقىرىپتىق كورمەلەر، بالالار مەن وقۋشىلارعا ارنالعان تاربيە ساعاتتارى ءوتىپ جاتىر. جالپى، جوسپارلانعان ءىس-شارالاردىڭ بارلىعى قوعامنىڭ تاۋەلسىزدىك قۇندىلىقتارى توڭىرەگىندە توپتاسۋىنا، ەل بىرلىگى مەن پاتريوتيزمنىڭ نىعايۋىنا ىقپال ەتەدى.
27- اقپاندا «AMANAT» پارتياسى مەن استانالىق ق ح ا ەرىكتى جاستار ۇيىمدارى ءداستۇر بويىنشا قارت كىسىلەرگە كومەك كورسەتىپ، اۋلالارىنىڭ قارىن كۇرەيدى.
ءدال وسى كۇنى قارتتار ۇيىندە ق ح ا-نىڭ ءداستۇرلى قايىرىمدىلىق اكسياسى وتەدى. جۇرتشىلىق ءۇشىن كونسەرت ۇيىمداستىرىلىپ، ەتنومادەني بىرلەستىكتەردىڭ ۇلتتىق تاعامدارىنان ءدام تاتادى.
سونداي-اق، 27- اقپاندا ەلورداداعى №43- مەكتەپتە الەۋمەتتىك از قامتىلعان وتباسىلاردان شىققان بالالارعا ارنالعان «بىرلىك پەن ىنتىماقتاستىققا 30 جىل» اتتى قايىرىمدىلىق اكتسياسى وتەدى.
28- اقپاندا قالا مەكتەپتەرىندە «قازاقستان حالقى اسسامبلەياسىنا 30 جىل» تاقىرىپتىق سىنىپ ساعاتتارى وتەدى. ناۋرىز بويى مەكتەپتەردە ارداگەرلەرمەن جانە قحا بەلسەندىلەرىمەن كەزدەسۋلەر، ءتۇرلى ءىس-شارالار ۇيىمداستىرىلادى.
1- ناۋرىزدا ەلورداداعى سالتاناتتى شارالار ماڭىزدى وقيعادان باستالادى: دوستىق ۇيىندە ق ح ا مەرەيتويىنا ارنالعان «قازاقستان حالقى اسسامبلەياسىنا 30 جىل» مەموريالدىق تاقتاسىنىڭ اشىلۋ سالتاناتى بولادى. ودان كەيىن حالىقارالىق دوڭگەلەك ۇستەل وتەدى، ونىڭ بارىسىندا اسسامبلەيانىڭ مەرەيتويىنا وراي قازاقستان پرەزيدەنتىنىڭ قۇتتىقتاۋ ءسوزى وقىلادى. بۇل شارا ق ح ا-نىڭ 30 جىلدىعىنا ارنالعان جىلدىڭ رەسمي باستاماسى بولماق.
ودان كەيىن دوڭگەلەك ۇستەلگە قاتىسۋشىلار «قازاق ەلىنە مىڭ العىس» مونۋمەنتىنە بارادى، وندا سالتاناتتى تۇردە گۇل شوقتارىن قويۋ ءراسىمى وتەدى.
سونىمەن قاتار، الەۋمەتتىك جەلىلەردە ءتۇرلى ەتنوستاردىڭ جاستاردىڭ قۇتتىقتاۋلارى بار ۆيدەو-چەللەندج باستاۋ الادى.
تاعى ءبىر ماڭىزدى ءىس- شارا - حالىقتىڭ مۇقتاج توپتارىن قولداۋعا باعىتتالعان «قايىرىمدىلىق كەرۋەنى» اكسياسىنىڭ باستالۋى.
ءدال وسى كۇنى، 1- ناۋرىزدا دوستىق ۇيىندە شىعارماشىلىق توپتاردىڭ قاتىسۋىمەن مەرەكەلىك كونسەرت وتەدى. بالالارعا مەرەكەلىك داستارحان ۇيىمداستىرىلادى.
بۇعان دەيىن حابارلانعانداي، الماتىدا العىس ايتۋ كۇنىنە ارنالعان ءىس-شارالار 25- اقپاندا باستالادى.
