استانادا قايرات نۇرتاستىڭ قاتىسۋىمەن وتەتىن كونسەرت كەيىنگە اۋىستى

концерт
Фото: instagram.com/bm_production_kz

استانا. KAZINFORM - ءانشىنىڭ قاتىسۋىمەن وتەتىن مۋزىكالىق كەش 7-شىلدە كۇنى ساعات 19:30 دا ەلورداداعى كونگرەسس حولدا ءوتۋى ءتيىس ەدى.

«7-شىلدە كۇنى «استانا» كونسەرت زالىندا وتەدى دەپ جوسپارلانعان قايرات نۇرتاس، ميراس جۇگىنىسوۆ جانە قازىبەك قۇرايىشتىڭ كونسەرتى باسقا كۇنگە اۋىستىرىلعانىن حابارلايمىز. ساتىپ الىنعان بيلەتتەردى ticketon.kz سايتى ارقىلى كەرى قايتارۋعا بولادى» دەلىنگەن حابارلامادا.

وسى ورايدا ەلوردا اكىمدىگى اتالعان كونسەرتتى جەكە ۇيىمداستىرۋشىلار وتكىزگەلى جاتقانىن حابارلادى.

ايتا كەتسەك، بۇگىن كولىكتەگى پوليتسيا دەپارتامەنتى قايرات نۇرتاستىڭ ۇستىنەن «الماتى- استانا» اۋە رەيسىندە ۇساق بۇزاقىلىق جانە دەنساۋلىققا قاساقانا جەڭىل زيان كەلتىرۋ فاكتىسى بويىنشا اكىمشىلىك ءىس قوزعالعانىن حابارلاعان ەدى.

استانا قالاسىنىڭ اكىمشىلىك ىستەر بويىنشا مامانداندىرىلعان سوتى تانىمال ءانشىنىڭ ءىسىن ونلاين قارادى جانە سول جەردە قايرات نۇرتاس مالىمدەمە جاسادى.

سوتتىڭ قاۋلىسىمەن قايرات نۇرتاس 15 تاۋلىككە قاماۋعا الىندى.

ەسكە سالا كەتەيىك، وتكەن جىلى تالدىقورعاندا ءانشى قايرات نۇرتاس وتىرعان كولىك جول ەرەجەسىن ورەسكەل بۇزعان بولاتىن.

سونداي-اق، 1000 دوللار اۆانستى قايتارماعانى ءۇشىن اتىراۋلىق كاسىپكەر قايرات نۇرتاستى سوتقا بەرگەن.

سوڭعى جاڭالىقتار